Sýret: instagram.com/amanat.partiyasy
Qalalyq jol-kólik ınfraqurylymyn jańǵyrtý jobasy aıasynda Momynov kóshesinde salynyp jatqan tórt jolaqty ótkelde jaıaý júrginshilerge arnalǵan jol jáne baǵdarshamdar ornatylady. Qurylys ótken jyly qarashada bastaldy, qazirgi tańda nysannyń 50 paıyzy daıyn. Merdiger uıymnyń málimetinshe, jumys josparǵa sáıkes júrip jatyr.
– Jol ótkel «Amanat» partııasynyń saılaýaldy baǵdarlamasy aıasynda salynyp jatyr. Bul – saılaýshylarǵa bergen naqty ýádelerimizdiń biri. Men osy jobanyń baǵdarlamaǵa enýine bastamashy bolyp, qarjy bólinýine yqpal ettim. Qazir nysannyń qurylysy sátti iske asýda, ony jeke baqylaýymda ustaımyn, – dedi B.Najmetdınuly.
Sonymen qatar Tilenshın kóshesinde osyǵan uqsas jol ótkeli salynyp jatyr, onyń daıyndyǵy – 20 paıyz. Eki nysan da 2026 jyldyń aıaǵyna deıin paıdalanýǵa beriledi.
Al Májilis depýtaty, «Amanat» partııasy fraksııasynyń múshesi Samat Musabaev Jańaózen qalasyna bardy. Munda depýtat gaz óńdeý zaýytynyń qurylys barysyn baqylady. Atalǵan joǵary tehnologııalyq nysan partııanyń saılaýaldy baǵdarlamasy aıasynda boı kóterip jatyr. Joba quny 216,8 mlrd teńgeni quraıdy. Jańa nysannyń qýaty jylyna 900 mıllıon tekshe metr tabıǵı jáne ilespe gaz óndirýge qaýqarly. Bul – elimiz úshin asa mańyzdy strategııalyq nysan. Sondyqtan jobany 2027 jylǵa deıin iske qosý kózdelip otyr.
– Jańaózen qalasynda jumys istep turǵan eski «Qazaq gaz óńdeý zaýyty» sonaý 1973 jyly ashylǵan edi. О́ndiris qýatyn arttyrý maqsatymen salynyp jatqan jańa zaýyt suıytylǵan gaz tapshylyǵyn joıady. Nysan qurylysy talapqa saı salynyp, belgilengen merzimde aıaqtalýǵa tıis, – dedi depýtat S.Musabaev.
«Respublica» partııasynan saılanǵan Májilis depýtaty Ekaterına Smolıakova jumys saparymen Shyǵys Qazaqstan oblysynda júr. Sapar barysynda ol ishki týrızmniń jaı-kúıin zerttep, jergilikti kásipkerlermen, turǵyndarmen kezdesti.
Ekaterına Smolıakova Qatonqaraǵaı men Úlken Naryn aýdandaryna jáne Buqtyrma sý qoımasynyń jaǵalaýyna bardy. Sondaı-aq oblystyq Kásipkerler palatasynyń týrızm keńesimen salanyń ózekti máselelerin talqylady. Atap aıtqanda, bas jospardyń bolmaýy, jaryqtyń jıi óshýi, ınternet pen baılanys sapasynyń tómendigi, ınfraqurylymnyń álsizdigi jáne tabıǵatqa uqypty qaraý mádenıetiniń jetkiliksizdigi. Bul faktorlar tabıǵı jáne ekonomıkalyq áleýeti zor óńirde týrızmniń damýyn tejep otyrǵany anyq.
– Kásipkerler ınvestısııa salýǵa daıyn, týrıster kelgisi keledi. Biraq qaı jerde qurylys júrgizýge bolatyny, qandaı nysandar josparlanǵany belgisiz. Jaryq joq, ınternet nashar. Bul – óńirdi ilgeriletýdiń mańyzdy quraly. Memleket tarapynan baǵdarlamalar men qoldaý sharalary bolǵanymen, ShQO-nyń týrızm áleýeti áli tolyq júzege asyrylmaǵan, – dedi depýtat.
Májilis depýtaty, JSDP fraksııasynyń múshesi Nurlan Áýesbaev Qostanaı oblysyna jumys sapary barysynda «Bılik. Halyq. Yntymaq» atty aımaqtyq konferensııaǵa qatysty. Is-sharada qatysýshylar kóppáterli turǵyn úıdi basqarý jáne múlik ıeleri birlestikteriniń (MIB) qyzmetin uıymdastyrý máselelerine aıryqsha nazar aýdardy. «Meniń úıim» Qostanaı oblystyq qaýymdastyǵynyń tóraǵa mindetin atqarýshy Saılaý Asylbaev osy saladaǵy problemalardyń áli de ózekti ári ótkir kúıinde turǵanyn aıtty.
– Qostanaı oblysyndaǵy kópqabatty úılerdiń jartysynan astamy áli kúnge deıin basqarý nysanyn aıqyndamaǵan. Sonyń saldarynan aýlalar abattandyrylmaı, jóndeý jumystary sozylyp keledi, al turǵyndar óz qarjysynyń qaıda jumsalyp jatqanyn bilmeıdi. Múlik ıeleri birlestikteri men qarapaıym turǵyndarǵa saýatty keńes, júıeli baqylaý jáne turaqty qoldaý qajet. Biz depýtattarmen, jergilikti bılik organdarymen birlese otyryp, bul salada tártip ornatýǵa daıynbyz. Eger turǵyndar naqty nátıjeni kórse, MIB-ke de, kondomınıýmdarǵa da degen senim arta túser edi, – dedi ol.
Budan bólek Nurlan Áýesbaev «Áýejaı» shaǵyn aýdanynyń bastapqy partııa uıymy belsendilerimen júzdesti. Kezdesý barysynda uıymnyń strategııalyq mindetteri, aldaǵy josparlary jáne turǵyndardy qoǵamdyq bastamalarǵa keńinen tartý tetikteri sóz boldy.
