Kásipkerlerdi qoldaý kózi

Keshe Ortalyq kommýnıkasııalar qyzmetinde «Kásipkerlikti qoldaý jáne damytý» taqyrybynda baspasóz máslıhaty ótti. Onda Kásipkerler palatasy basqarmasynyń tóraǵasy Abylaı Myrzahmetov taqyryp aıasynda áńgime órbitti. Spıker Memleket basshysynyń tóraǵalyǵymen taıaýda bolǵan Úkimettiń keńeıtilgen otyrysynda kóterilgen ózekti máselelerge toqtaldy. Sóıtip, «Nurly Jol – bolashaqqa bastar jol» Joldaýynda júktelgen tapsyrmalardyń oryndalý barysy týraly áńgimeledi. Sondaı-aq, otandyq kásipkerlerdiń qazirgi kezigip otyrǵan qıyndyqtary jóninde de aıtty. «El damýyndaǵy negizgi baǵdarlamaǵa aınalǵan Joldaýda jumyssyzdyqty múmkindiginshe qysqartyp, jańa qyzmet oryndaryn ashý isi Úkimet pen ulttyq kompanııalarǵa arnaıy tapsyrma retinde berilgeni málim. Osy turǵyda jańa jumys oryndaryn ashýda kásipkerlerdiń róli úlken ekeni belgili. Sondyqtan, qazirgi kúnde burynǵy jumys oryndaryn saqtap, jańa kásiporyndar men qyzmet kórsetý mekemelerin uıymdastyrý sharasy bizdiń salada da júıeli júrgizilip jatyr», dedi basqarma tóraǵasy. Qazirgi tańda otandyq kásipkerlerge kórshi Reseı eline salynǵan sanksııalar men rýbldiń qunsyzdanýy aýyr tıip otyrǵanyn aıtqan A.Myrzahmetov, daǵdarysty eńserýge Úkimet barlyq múmkindikterdi qarastyryp otyrǵanyn jetkizdi. Al «Nurly Jol» baǵdarlamasy boıynsha salynatyn barlyq nysandardy ózimizdiń kompanııalar salyp, olarǵa qoldanylatyn barlyq qurylys materıaldaryn otandyq kásiporyndarda jasaý kerektigin túsindirdi. «О́zderińiz bilesizder, Ulttyq qordan úsh jyldyń ishinde «Nurly Jol» baǵdarlamasy boıynsha 3 mlrd. AQSh dollary bólinedi. Onyń syrtynda «Damý» qory arqyly kásipkerlikti qoldaýǵa 100 mlrd. teńge baǵyttalǵan bolatyn. Endi «Nurly Jol» baǵdarlamasy engizgen ózgeristerdiń arqasynda osy 100 mlrd. qarjynyń ústine taǵy 100 mlrd. teńge qosylady degen jos­par bar. Bul qarajat «Damý» qory nemese «Báıterek» holdıngi arqyly bankterge jetkizilip, sol arqyly kásipkerlerge kómek qolyn sozady», dedi ol. Osy oraıda taǵy bir aıtylǵan mańyzdy shara, daǵdarys kezinde barlyq ishki suranysty óz elimizde qaldyrǵan jón eken. «Iаǵnı ulttyq kompanııalar men memlekettik organdardyń tapsyrystaryn syrtqa shyǵarmaı, óz kásipkerlerimizge bergizý qajet. Bul týraly naqty baǵdarlama bar. Qazirgi ýaqytta 280-ge jýyq kásiporyn bul baǵdarlamaǵa kirgen, onyń tizimi qazir kóbeıý ústinde. Bul týraly Elbasy da naqty aıtqan. Iаǵnı «Nurly Jol» baǵdarlamasy boıynsha salynatyn barlyq nysandardy ózimizdiń kompanııalar salyp, olarǵa qoldanylatyn barlyq qurylys materıaldary ózimizdiń kásiporyndarda jasalýy tıis. Osy jumysty biz Úkimetpen birge baqylaýǵa alyp, jospar boıynsha júrgizilýin qadaǵalaıtyn bolamyz», dedi A.Myrzahmetov. Nurbaı ELMURATOV, «Egemen Qazaqstan».