Foto: Sý resýrstary jáne ırrıgasııa mınıstrligi
2023 jyly basseın ınspeksııalary sý zańnamasynyń talaptaryn saqtaý boıynsha 105 tekseris júrgizip, nátıjesinde 208 zańbuzýshylyq anyqtaldy. Olardy joıý úshin 81 uıǵarym berilip, jalpy somasy 21,4 mln teńgege 149 ákimshilik aıyppul salynǵan.
2024 jyly basseın ınspeksııalary 439 tekseris júrgizip, 1 855 zańbuzýshylyqty anyqtaǵan, olar boıynsha 429 uıǵarym berildi. Tekseristerdiń qorytyndysy boıynsha jalpy somasy 48,4 mln teńgege 582 ákimshilik aıyppul salyndy.
Al 2025 jyldyń basynan beri 82 tekseris júrgizilip, 141 zańbuzýshylyq tirkelip, sol boıynsha 69 uıǵarym berilip, jalpy somasy 24 mln teńgege 254 aıyppul salynyp otyr.
Sala mınıstri Nurjan Nurjigitovtiń aıtýynsha byltyr vedomstvonyń Sý resýrstaryn retteý, qorǵaý jáne paıdalaný jónindegi komıteti quryldy. Onyń negizgi mindeti – sýdy zańsyz paıdalaný men sý esebin burmalaýǵa qarsy kúres júrgizý, sondaı-aq sý nysandaryndaǵy zańsyz áreketterdiń jolyn kesý.
«Júktelgen mindetterdiń sapaly oryndalýyn qamtamasyz etý úshin qyzmetkerler sanyn arttyrý, aýmaqtyq bólimsheler jelisin keńeıtý jáne basseın ınspeksııalaryn tehnıkalyq jaǵynan jabdyqtaý boıynsha sharalar qabyldandy. Budan bólek, ınspeksııalarǵa baqylaý júrgizý quzyreti berildi, soǵan sáıkes olar jedel áreket etý sharalaryn qoldana alady», dedi N.Nurjigitov.
Mınıstrliktiń málimetinshe sýdyń «kóleńkeli naryǵymen» kúresý úshin mınıstrlik qabyldaǵan sharalardyń ishinde sý salasyndaǵy zańbuzýshylyqtar úshin jazany qatańdatý da qarastyrylǵan. Oǵan qosa, bıyl 10 maýsymnan bastap sýarý sýyn paıdalaný erejeleri kúshine endi. Bul erejelerge sáıkes, kelisimshartsyz sý tutynǵany jáne daqyl túrin sý jetkizýshimen kelispeı ózgertkeni úshin ákimshilik jaýapkershilik qarastyrylǵan.
Sondaı-aq quqyqbuzýshylyqtardyń aldyn alý maqsatynda túsindirý jumystary da júrgizilip jatyr. Bıyl basseın ınspeksııalary 1 861 sharýashylyq sýbektisin qamtyǵan 125 túsindirý is-sharasyn ótkizdi. Sonyń nátıjesinde sý paıdalanýshylar arnaıy ruqsat qujattaryn belsendi túrde rásimdeı bastady. Osylaısha jyl basynan beri 445 ruqsat qujaty berilgen.
