Tútinimizdiń túzý ushqanyn qalaımyz

Keshe Táýelsizdik saraıynda Demokratııalyq kúshterdiń «Qazaqstan-2050» jalpyulttyq koalısııasy bas qosyp, Qazaqstan halqy Assambleıasy Keńesiniń kezekten tys prezıdenttik saılaý ótkizý týraly bastamasyn talqylady. Otyrysty ashyp, ony júr­gizgen «Nur Otan» partııasy Tóraǵasynyń birinshi orynbasary Baýyrjan Baıbek: Demo­kratııalyq kúshterdiń «Qazaq­stan-2050» jalpyulttyq koalı­sııasynyń jumysy elimizdegi eń bir bedeldi de ókiletti únqatysý alańyna aınaldy. Azamattyq qoǵamnyń túrli áleýmettik toptary men jalpy turǵyndardyń múddesin kózdegen koalısııa áralýan kózqaras pen ustanymdar ıesi, saıası kúshterdiń ashyq pikir­talasy men salıqaly únqa­tysýyn qamtamasyz etedi. «Keńes qylǵan el azbas» degendeı, koalısııa basqosýlary barysynda qyzý talqylaýlar jolymen áleýmettiń eń bir ózekti ári mańyzdy máseleleri boıynsha tutas qoǵamnyń ustanymy qalyptasyp jatady. El ıgiligi úshin memleket tarapynan qabyldanǵan ilkimdi sharalar jóninen qalyń jurtshylyqty habardar etýge ári azamattardyń oǵan degen senimin nyǵaıtýǵa súbeli úles qosýshy jalpyulttyq koalısııa qoǵamnyń judyryqtaı jumylýyna, osy arqyly Elbasynyń memlekettik baǵytynyń júzege asýyna óz septigin tıgizý ústinde. Esterińizge sala ketsem, biz, máselen, Qazaqstannyń EAEO-ǵa enýi, sybaılas jemqorlyqqa qarsy ulttyq strategııany qabyldaý máselelerin jan-jaqty saraladyq. Ákimder saılaýy, jergilikti ózin ózi basqarý, kásipodaqtar týraly asa mańyzdy jobalar barshamyzdyń ózara qyzý talqylaýymyzdan ótti. Osynyń bári elde iske asyrylyp jatqan reformalar barysyna ózindik yqpal etip, el múddesin dittegen qajetti zańdardyń qabyldanýyna jol ashty. Búginde koalısııa 6 jetekshi partııa men 18 iri respýblıkalyq qoǵamdyq birlestiktiń, sondaı-aq, 500-den astam óńirlik úkimettik emes uıymnyń basyn qosqan áleýetti kúsh», deı kele, búgingi kúni uzyn sany 6,5 mln.-nan astam adamnyń múddesin kózdegen jalpyulttyq koalısııanyń osy otyrysta asa mańyzdy másele, el Prezıdentin saılaýdy 2015 jyly ótkizý bastamasyn talqylaýǵa jınalǵandaryn aıtyp, olardyń óz oı-pikirlerimen bólise otyrýyn suraǵan. Budan keıin berilgen sóz kezegin ilip áketken QHA Tóraǵasynyń orynbasary, Parlament Senatynyń depýtaty Anatolıı Bashmakov 2015 jyly kezekten tys prezıdenttik saılaý ótkizý ıdeıasynyń aıaq astynan bolmaǵanyn, onyń oılanyp-tolǵanyp baryp, jurtshylyqtyń ótinishteri boıynsha jasalǵanyn alǵa tartty. «Búgingi kúni qazaqstandyqtar turaqty da úılesimdi qoǵamda ómir súrýde. Al ony saqtap qana qoımaı, ári qaraı damyta túsý asa mańyzdy. Prezıdent osydan birneshe aı buryn «Nurly Jol» baǵdarlamasyn jarııa etti. Bul–bolashaqqa jol, búgingi álemde bolyp jatqan qıyndyqtar men qaterlerdi eńserýdiń joly», dep jáne aldaǵy 2016 jylǵa elimizde eki iri elektoraldy naýqannyń tus kelýi bıýdjetke salmaq túsiretinin eske salyp, kezekten tys saılaý ótkizý ıdeıasynyń osy jaǵyn da qaperde ustaýdy eskertti. Kaolısııa otyrysynda «Aq jol» partııasynyń tóraǵasy Azat Perýashev, Qazaqstan Kommýnıstik halyq partııasynyń hatshysy Jambyl Ahmetbekov, «Aýyl» sosıal-demokratııalyq partııasynyń tóraǵasy Ǵanı Qalıev, «Birlik» partııasynyń jáne azamattyq qoǵamnyń belsendi ókilderi óz pikirlerin ortaǵa salyp, keıbireýleri málimdeme de jasap úlgerdi. Máselen, «Birlik» saıası partııasynyń málimdemesinde: «Elimizdiń jumysshylary, ónerkásip oryndaryndaǵy ınjenerleri, fermerler men kásipkerler, ustazdar men dárigerler, ǵalymdar men stýdentter, mádenıet jáne quqyq salasynyń qyzmetkerleri múshe bolyp otyrǵan «Birlik» saıası partııasy Qazaqstan halqy Assambleıasynyń Keńesi bastamashylyq jasaǵan 2015 jyly kezekten tys prezıdenttik saılaý ótkizýge qatysty óziniń ustanymyn bildiredi. Bul saılaýdy ótkizý ıdeıasy qazirgi kezeńde talap etilgen jaǵdaı bolyp otyr. Kezekten tys prezıdenttik saılaý elimizdiń qarqyndy damýymen qosa, qabyldaǵan ulttyq josparlarmen birge «Nurly Jol» baǵdarlamasynyń júzege asyrylýyna oń yqpalyn tıgizetini sózsiz. Álemdik geosaıası jáne ekonomıkalyq turaqsyzdyq jaǵdaıynda bizdiń birigýimizdiń, barlyq múmkindikterimizdi jahandyq daǵdarystyń el ekonomıkasyna teris áserin eńserýge baǵyttaýdyń mańyzdylyǵy zor. Mine, sondyqtan da «Birlik» partııasy atalǵan bastamany tolyqtaı qoldap otyr...», delingen. Al Patrıottar partııasynyń tóraǵasy Ǵanı Qasymov pen «Aýyl» sosıal-demokratııalyq partııasynyń tóraǵasy Ǵanı Qalıev te búgingi kúni prezıdenttikke tek Nursultan Nazarbaevtyń laıyq ekendigin aıtty. Ǵanı Qasymov: «A» deı otyryp, «b»-ny da aıtýymyz kerek. Prezıdenttikten úmitker retinde Memleket basshysy Nursultan Ábishuly Nazarbaevtyń jalǵyz kandıdat bolýyn qalaımyz», dep otyrystan tys jýrnalıster tarapynan qoıylǵan saýalǵa bylaı dep jaýap berdi: «Men qarapaıym ǵana bir sebeppen óz kandıdatýramdy usynbaımyn. О́ıtkeni, men osyǵan deıin bul ózenge eki márte túsip shyqqanmyn. Prezıdenttikke kandıdat bolýdyń, ásirese, kún saıyn dúıim eldiń nazarynda bolýdyń qanshalyqty qıyn ekendigin bilemin. Úshinshi ret kandıdat bolǵym kelmeıdi. Tań atqannan keshke deıin saılaý naýqany barysynda 2 aı boıy baspasózben tikeleı aralasý óte qıyn synaq», dedi. Otyrys sońynda árbir úıdiń, elimizdiń tútini túzý ushyp, yntymaǵy jarasqan berekeli el bolýdaǵy, kezekten tys prezıdenttik saılaýdy ótkizýdiń mańyzdylyǵyna toqtalyp, saılaýǵa qatysýǵa shaqyrǵan kaolısııa músheleri qazaqstandyqtarǵa biraýyzdan úndeý arnady. Anar TО́LEÝHANQYZY, «Egemen Qazaqstan».