Kıeli Syr boıynda ómirge kelgen qylqalam sheberi jas kúninen beıneleý ónerine yntyq boldy. Almatydaǵy kórkemsýret ýchılıshesin aıaqtaǵannan keıin, bilimin odan ári V.I.Sýrıkov atyndaǵy Máskeý memlekettik kórkemsýret ınstıtýtynda jalǵastyrdy. Sonda oqyp júrip, biregeı óner tarlandarynan tálim aldy.
Talantty sýretshi beıneleý óneriniń barlyq janryna qalam terbedi. Ásirese A.Dúzelhanov keskindeme janrynda erekshe qoltańbasyn qaldyrdy. Ol «Altyn sarbaz», «Túrkistan», «Ordabasy», «Kóroǵly», «Oǵyz han» atty týyndylarymen ulttyq beıneleý óneriniń qazynasyn baıytty. Sondaı-aq «Qorqyt», «Abylaı han», «Ábilqaıyr han», «Tóle bı», «Qazybek bı», «Áıteke bı» atty portretteri arqyly tarıhı tulǵalardyń beınesin tiriltti. Al «Tumar patshaıym», «Qyz Jibek», «Qyz uzatý», «Aıman-Sholpan» atty kartınalarymen qazaq arýlarynyń sulýlyǵyn aıshyqty kórkemdedi.
Kórnekti keskindemeshi otandyq kitap ıllıýstrasııa salasyn damytýǵa da súbeli úles qosty. О́ner maıtalmany kózi tirisinde tarıhı, folklorlyq taqyryptar men balalarǵa arnalǵan eki júzden astam kitap pen áleýmettik jáne tarıhı taqyryptaǵy elýden asa plakatty ásem bezendirgen. Qanshama shákirt tárbıelep, ulaǵatty ustaz boldy. Professor atandy. Joǵary oqý oryndarynyń stýdentterine arnap grafıkalyq óner tehnıkasy boıynsha oqý-ádistemelik quralyn jazdy.
Búginde Aǵymsaly Dúzelhanovtyń tarıhı týyndylary el Prezıdentiniń rezıdensııasynda, sondaı-aq joǵary memlekettik mekemelerdiń tórinen oryn alǵan. Birqatar shyǵarmalary elimizdegi mýzeıler men sheteldegi murajaılarda saqtaýly tur. Birtýar sheberdiń esimi elimizge ǵana emes, alys-jaqyn shet memleketterge de jaqsy tanys. Osy ǵasyr basynda álemniń 100-den astam elinen kelgen sýretshiler qatysqan BUU Nıý-Iorkte (AQSh) uıymdastyrǵan «Global Art-2000» halyqaralyq kórmesinde top jaryp, dúnıejúziniń úzdik 33 qylqalam sheberiniń qataryna endi.
Mine, osyndaı otandyq beıneleý ónerine ólsheýsiz úles qosqan talantty tulǵa babalar ketken máńgilik jolǵa bet burdy. Biraq onyń ǵajaıyp shyǵarmalary bar da aıtýly qylqalam sheberiniń esimi eshqashan umytylmaıdy.
