Onyń aıtýynsha, sońǵy 20 jylda Qazaqstan Qyrǵyzstanǵa 1,4 mıllıard dollar kóleminde ınvestısııa salǵan, onyń ishinde áleýmettik mańyzy zor jobalar da bar.
Memleket basshysy eki el arasyndaǵy ekonomıkalyq yntymaqtastyqtyń odan ári damıtynyn atap ótti.
«Biz birlesken kásiporyndardyń tıimdi jumys isteýi úshin qolaıly jaǵdaı jasaı beremiz dep kelistik. Sondaı-aq qazaq-qyrǵyz shekarasynyń ótkizý múmkindigin arttyrýǵa basa mán berdik. Júk tasymaly máselesine de erekshe nazar aýdardyq. Sońǵy kezde osy baǵytta birqatar aýqymdy is-shara atqaryldy. Qazir shekaradaǵy segiz ótkizý beketin jańǵyrtý jumysy júrgizilip jatyr. Bul jumys aldaǵy eki jylda tolyq aıaqtalady. Ony eki el úkimeti erekshe baqylaýda ustaıdy. Munyń bári ózara saýda kólemin arttyrýǵa septigin tıgizedi», deıdi Prezıdent.
