Foto: QR Básekelestikti qorǵaý jáne damytý agenttigi
Taldaý nátıjeleri boıynsha, «Documentolog» JShS «Documentolog» júıesiniń paıdalanýshylary men «Work Space», «Meta Doc», «Somnium» sııaqty ózge júıelerdiń paıdalanýshylary arasyndaǵy hat almasýǵa kedergi keltirgeni anyqtaldy. Elektrondyq qujattardy qabyldamaýǵa jol bermeý jónindegi talapqa (QRnyń «Elektrondyq qujat jáne elektrondyq sıfrlyq qoltańba týraly» Zańynyń 24-baby) qaramastan, Seriktestik úsh jyl boıy hat-habar almasýdy buǵattap kelgen. Budan bólek, ol hat-habardy tek óziniń shlıýzi («Qazaqstandyq elektrondyq derekter almasý ortalyǵy») arqyly aqyly negizde qabyldaýdy qarastyrǵan.
Júrgizilgen taldaý qorytyndysy boıynsha, «Documentolog» JShS 2021-2024 jyldar aralyǵynda naryqtaǵy ústemdik jaǵdaıdy ıelengen sýbekt dep tanyldy. Agenttik tarapynan kompanııaǵa ústem jaǵdaıdy teris paıdalanýdyń belgileri týraly habarlama joldanǵanymen, bıznes-sýbekt atalǵan qujatty moıyndaǵan joq. Osyǵan baılanysty 2025 jylǵy sáýir aıynda BQDA-nyń Astana qalasy boıynsha departamenti tergeý bastaǵan bolatyn.
Tergeýdi toqtatý týraly talap-aryzben Seriktestik (Astana qalasynyń arnaıy aýdanaralyq ákimshilik) sotqa júgindi. Alaıda sot birinshi ınstansııada isti qaraý nátıjesinde Seriktestiń talaptaryn qanaǵattandyrýdan bas tartty.
Sondaı-aq sıfrlandyrý salasyndaǵy ýákiletti organ (Sıfrlyq damý, ınnovasııalar jáne aeroǵarysh ónerkásibi mınıstrligi) tarapynan da sharalar qabyldanyp, Seriktestikke buzýshylyqty joıý týraly akt engizildi. Qabyldanǵan sharalardyń nátıjesinde, qazirgi ýaqytta Seriktestik qujattardy jetkizbeý tájirıbesin toqtatty, al «Documentolog» júıesine hat-habar atalǵan shlıýz arqyly kedergisiz qabyldanyp jatyr.
Sonymen qatar, aǵymdaǵy jyly Seriktestik «Documentolog» baǵdarlamalyq qamtamasyz etýge berilgen lısenzııalardy Mınıstrliktiń balansyna ótkizdi, alaıda zııatkerlik menshik obektilerine, sonyń ishinde bastapqy kodqa aıryqsha quqyqtardy ózinde qaldyrdy.
Naryq qatysýshylary berilgen lısenzııalar Seriktestiktiń osy naryqtaǵy ústem jaǵdaıyn saqtap qalatynyn jáne ózge elektrondyq qujat aınalymy júıelerin jetkizýge kedergi jasaıtynyn aıtyp alańdaýshylyq bildirip jatyr.
Budan bólek, «Documentolog» baǵdarlamalyq qamtamasyz etýdi kútip-ustaýǵa bolashaqta shyǵyndar qajet bolǵandyqtan, memleket jyl saıyn tehnıkalyq qyzmet kórsetýdi (jańartý, baǵdarlamany jetildirý, tehnıkalyq qoldaý boıynsha koll-ortalyq jumysy jáne t.b.) dál osy quqyq ıelenýshiden – joǵaryda atalǵan JShS-den satyp alýǵa májbúr bolady.
Júrgizilgen taldaý men tergeý nátıjeleri boıynsha BQDA tıisti usynymdar ázirlep, olardy sheshim qabyldaý úshin ýákiletti memlekettik organdarǵa joldaıdy. Agenttik tarapynan bul baǵyttaǵy jumys jalǵasyn tabady.
