Sýretti túsirgen – Álı Ǵalym
E.Rahmadıev atyndaǵy memlekettik akademııalyq fılarmonııada jastar ulttyq kompanııalardan bastap, ónerkásiptik kásiporyndarǵa deıingi 70-ten asa kompanııalardyń ókilderimen betpe-bet sóılesti. Osylaısha jumysqa ornalasý múmkindigi týraly bilip, alǵashqy suhbattan ótti.
– Men kolledjdi «elektromonter» mamandyǵy boıynsha támamdap, uzaq ýaqyt laıyqty jumys izdedim. Osy jármeńkede birneshe kompanııa ókilimen sóılesip, suhbatqa shaqyrý aldym. Munda jumys berýshi sizdi tańdamaıdy, kerisinshe siz bos jumys oryndarynyń arasynan ózińizge qolaılysyn tańdaısyz, – dedi jármeńkege qatysqan Aıdar Kenjebaev.
Jármeńke aıasynda «Otbasy bank» ókilderi ıpoteka resimdeýge nıetti azamattarǵa keńes berip, Astana qalasy ákimdiginiń ókilderi NEET sanatyndaǵy jastardy jumyspen qamtýǵa járdemdesý boıynsha «Joltap» jobasyn usyndy. Al elordadaǵy Eńbek utqyrlyǵy ortalyǵynyń qyzmetkerleri túlekterge arnalǵan «Alǵashqy jumys orny» jáne «Jastar praktıkasy» jobalary týraly habardar etti. Sonymen qatar azamattarǵa elimizdiń ózge óńirlerine kóship barý múmkindigi týraly málimet usynyldy.
«Amanat» partııasynyń atqarýshy hatshysy Dáýlet Káribek Memleket basshysy Qasym-Jomart Toqaev jarııalaǵan Jumysshy mamandyqtary jylynda osyndaı is-sharalar uıymdastyrýdyń máni men mańyzyna toqtaldy.
– Búginde jumysshy mamandyqtar – turaqtylyq pen joǵary suranys qana emes, sonymen qatar laıyqty jalaqy, syı-qurmet jáne mansap jolynda joǵarylaý múmkindigi. Jastar ekonomıkanyń osy sektoryna bet buryp, el erteńi eńbekpen baılanysty ekenin túsine bastady. Bizdiń bos jumys oryndary jármeńkelerimiz jastarǵa ómirde óz ornyn, al jumys berýshilerge laıyqty maman tabýyna kómektesedi. Máselen, partııanyń Eńbek jáne halyqty áleýmettik qorǵaý mınıstrligimen birlesip júzege asyryp jatqan «Jastarǵa jumys» jobasy óz tıimdiligin dáleldedi. Keıingi eki jylda 150 myńǵa jýyq jas azamat qamtylǵan 1,5 myńnan asa is-shara ótkizildi. 200-ge jýyq bos jumys oryndary jármeńkesi uıymdastyryldy, oǵan 5,2 myńnan asa uıym qatysty, 55 myńnan asa jas azamat jumysqa ornalastyryldy. Shalǵaıdaǵy eldi mekenderdi qamtý maqsatynda «Jastar rýhynyń» mobıldi toptary 150-den asa aýylǵa baryp, 55 myń adamǵa áleýmettik-eńbek máseleleri boıynsha keńes berdi, – dedi D.Káribek.
Sondaı-aq jármeńkede «Taza Qazaqstan» arnaıy orny jumys istedi. Onda qaıta óńdeý maqsatynda plastık jınalyp, jasyl tehnologııalar týraly málimet berildi.
Astanamen birge «Jastar rýhynyń» bastamasymen elimizdiń barlyq oblys ortalyǵynda osyndaı jármeńkeler ótedi. Olarǵa kem degende 50 myń jas keledi dep josparlanyp otyr. Is-shara «bir tereze» qaǵıdaty negizinde uıymdastyrylady.
