Buǵan deıin «AMANAT» partııasy Úkimetpen birlese otyryp, jumysshy jastardyń áleýmettik máselelerin sheshý jáne kásibı áleýetin arttyrýǵa baǵyttalǵan «Jumysshy jastar amanaty» jobasyn iske qosqan bolatyn. Jambyldaǵy bul forým atalǵan jobany júıeli júzege asyrý jolyndaǵy naqty is-sharanyń biri.
Alǵashqy sóz kezegin Májilis depýtaty, «AMANAT» partııasy fraksııasynyń múshesi Muqash Eskendirov alyp, óz isiniń sheberi bolýdyń mán-mańyzyna toqtaldy. Ol jastardy elimizdiń damýy jolynda aıanbaı eńbek etýge shaqyrdy.
«Elimizde jyl saıyn aýqymdy jobalar júzege asyrylyp jatyr. Onyń birqatary osy Jambyl oblysynda qolǵa alynýda. Bul jobalardy júıeli júzege asyrý úshin, árıne jumysshy jastar qajet. Sondyqtan Qazaqstannyń bolashaǵy – jumysshy mamandyq ıelerimen tikeleı baılanysty. Qazirdiń ózinde qoǵamda óndiris salasynyń mamandary erekshe baǵalanady. Al osyndaı is-sharalar arqyly belsendi jastardy qoldaý isine jarqyn jol ashylyp otyr. Sebebi ómirde barlyq jetistik tek adal eńbekpen, qajyrly qyzmetpen keledi», dedi depýtat.
«Jastar Rýhy» jastar qanatynyń tóraıymy Aqerke Iskanderova da sóz sóılep, eńbek jolynda júrgen jastarǵa memleket tarapynan jan-jaqty qoldaý kórsetilip jatqanyn atap ótti.
«Bul forým – jumysshy jastardyń daýysy estiletin, olardyń bolashaǵyna qatysty máseleler talqylanatyn alań. Jyl ótken saıyn elimizde eńbek adamyna degen qurmet pen kásiptik bilimge degen suranys arta túsýde. Osy oraıda, «Jastar Rýhy» jastar qanaty óndiris salasynda eńbek etetin jastardyń áleýetin ashý maqsatynda naqty jumys atqaryp keledi. Máselen, dástúrli «Jastarǵa jumys» jobasy aıasynda elimizdiń barlyq aımaǵynda aýqymdy bos jumys oryndary jármeńkeleri ótkiziledi. Jýyrda Astana qalasynda ótken osyndaı jármeńkege 3000-ǵa jýyq adam qatysyp, 70-ten astam kásiporyn 2000-nan astam bos jumys ornyn usyndy», dedi ol.
«Jastarǵa jumys» jobasy eki jyl ishinde óz tıimdiligin dáleldedi. Osy ýaqyt aralyǵynda 150 myńǵa jýyq jas qamtylǵan 1,5 myńnan astam is-shara uıymdastyryldy. 200-ge jýyq jármeńke ótkizilip, oǵan 5,2 myńnan astam uıym qatysqan. Sonyń nátıjesinde 55 myńnan asa jas turaqty jumysqa ornalastyryldy. Sondaı-aq shalǵaı aýyldardaǵy jastardy qamtý úshin «Jastar Rýhy» mobıldi toptary 150-den astam eldi mekenge baryp, 55 myń adamǵa áleýmettik jáne eńbek salasyna qatysty keńester berdi.
Osyǵan qosa, aımaqtyq forýmdar ótip, eńbek naryǵyna baılanysty ashyq pikirtalastar júrgizildi. Eldiń segiz óńirinde iri kásiporyndarda jastar men mektep oqýshylary úshin kásiptik baǵdar berý ekskýrsııalary uıymdastyryldy. Nátıjesinde 5000-nan astam jas eńbek naryǵy týraly tolyq málimet alyp, olardyń 180-nen astamy turaqty jumysqa ornalasty. Al jumysshy mamandyqtarynyń abyroıyn kóterý maqsatynda «Jastar Rýhy» «Eńbek dańqy: Jumysshy mamandar áýleti» atty arnaıy medıa-jobany júzege asyrdy.
Jambyl oblysy ákiminiń orynbasary Qanatbek Mádibek forým barysynda aımaqta jumysshy jastarǵa qoldaý baǵytynda naqty sharalar qolǵa alynyp jatqanyn jetkizdi.
«Búginde Jambyl oblysynda ınvestısııa tartý baǵytynda josparly jumys júrgizilýde. Aldaǵy ýaqytta óńirde 62 ınvestısııalyq jobany qolǵa alý kózdelip otyr. Ony júzege asyrý barysynda 6 myńǵa jýyq jumys orny ashylady. Iаǵnı, bul qadam ýnıversıtet pen kolledj túlekterin jyl saıyn jumysqa ornalastyrýǵa múmkindik beredi. Osy oraıda, óńirdegi joǵary oqý oryndarynda kadr daıyndaý jumysy qolǵa alynýda. Bizdiń basty mindetimiz – kásibı mamandardyń jańa býynyn tárbıeleý jáne olardyń boıyna adaldyq, jaýapkershilik syndy asyl qasıetterdi sińirý», dedi ol.
Qazirgi tańda Jambyl oblysynda 355 myńnan astam jas turady, bul – óńir halqynyń 29,1 paıyzy. Onyń ishinde 41,8%-y qalada, al 58,2%-y aýyldyq jerde ómir súrýde. Forýmda sóz alǵan jas mamandar da óz tájirıbesimen bólisti.
«TALAS INVESTMENT COMPANY» JShS-niń qyzmetkeri Beksultan Bolǵanbek eńbek jolyn slesar bolyp bastap, keıinnen qazandyq operatory, tońazytqysh qondyrǵylary aýmaǵynyń sheberi sııaqty túrli satylardan ótip, búginde energetıka resýrstarymen qamtamasyz etý sehy bastyǵynyń orynbasary qyzmetin atqaryp júr.
«Bul kásiporynda júzdegen maman eńbek etedi. Solardyń qatarynda men de barmyn. Eńbek jolymdy slesar retinde bastap, keıin qazandyq operatory, kompressorlyq jáne tońazytqysh qondyrǵylary aýmaǵynyń sheberi, qazandyq aýmaǵynyń sheberi bolyp jumys istedim. Búginde energetıka resýrstarymen qamtamasyz etý sehy bastyǵynyń orynbasary qyzmetin abyroımen atqaryp júrmin. Osyndaı iri óndiris ornynda eńbek etý – jas mamandar úshin zor mártebe ári joǵary jaýapkershilik. Kompanııa bizge barynsha qolaıly jaǵdaı jasap otyr. Munda kásiptik mashyǵymyzdy jetildirýge qajet barlyq múmkindik bar. Ujymymyzǵa bilikti, adal jumysshy jastar qashan da qajet», dedi ol.
Al «Kazfosfat» JShS-ne qarasty zaýyttyń ınjeneri Qaısar Aldahmetovtiń aıtýynsha, kásiporynda 35 jasqa deıingi 1128 maman eńbek etip jatyr.
«Jumysshy jastar – adaldyq pen tabandylyqtyń úlgisi. Zaýyttarda, qurylys alańdarynda, aýyl sharýashylyǵy salasynda jáne túrli óndiris ornynda eńbek etip júrgen jas býyn – el ekonomıkasynyń tiregi. Jumysshy maman bola júrip, qoǵam damýyna da úles qosýǵa, boıdaǵy qabilet pen áleýetti kórsetýge tolyq múmkindik bar. Mysaly, men qarapaıym zaýyt jumysshysy bola júrip, Taraz qalalyq máslıhatynyń depýtaty retinde saılandym. Búginde qala turǵyndarynyń senimin arqalaǵan azamat retinde óndiris salasynda eńbek etip júrgen jastardyń múddesin qorǵap, olardyń áleýmettik máselelerin sheshýge atsalysyp kelemin», dedi ol.
Forým barysynda jumysshy jastardyń áleýetin arttyrý, olardy qoldaý jáne eńbek qundylyǵyn dáripteý baǵytynda naqty usynystar aıtyldy.
