Úmitti úkilegen «Ulytaý úni»

Festıvaldyń ashylý sal­ta­natynda Mem­le­kettik syı­lyqtyń laýreaty Kenjeǵalı Myrjyqbaı, «Da­ryn» memlekettik jastar syı­ly­ǵynyń laýreaty Asqar Mu­qııat, Qazaq­stannyń eńbek sińirgen ártisi Be­reke Kóshenov, «Joshy» etno-folklorlyq ansambli óner kórsetti.

Festıvalda qazaqtyń tól mádenıeti men ulttyq ónerin nasıhattaǵan tórt iri baıqaý – Shámshi Qaldaıaqovtyń 95 jyl­dyǵyna arnalǵan ánshiler baı­qaýy, Ketbuqa jyraýdyń 840 jyldyǵyna arnalǵan kúıshiler baıqaýy, Nurǵısa Tilendıevtiń 100 jyldyǵyna arnalǵan mýltıaspapshylar baıqaýy jáne aqyn­dar aıtysy ótti.

Ketbuqa babamyzdyń týǵa­nyna – bıyl 840 jyl. Osy aıtýly oqıǵaǵa oraı festıval aıa­synda kúıshiler sa­ıysy ótti. Dom­byrashylar elimizdiń toǵyz óńirinen qatysty. Kúı saıysynyń birinshi, ekinshi kezeńinde árbir qatysýshy úsh shyǵarmadan oryndady.

Baıqaýdyń qazylar alqa­synyń tóraǵasy Qazaqstannyń eńbek sińirgen qaıratkeri, kúıshi Janǵalı Júzbaı boldy. Qazylar alqasynyń sheshimimen bas júl­deni Aısholpan Qasymova (As­tana qalasy) oljalady. I oryndy Ernar Sátim (Túrkistan oblysy), II oryndy Syrym Shombaev (Jambyl oblysy), III oryndy Al­tynaı Mahmýt (Qaraǵandy obly­sy), Nurıden Ospanov (Ulytaý oblysy) ıelendi.

Keńgir sýqoımasy jaǵalaýyn­daǵy Amfıteatr sahnasynda Shám­shi Qal­daıaqovtyń týǵanyna 95 jyldyǵyna ar­nalǵan vokaldyq baıqaýǵa on bir oblystan 14 ánshi qatysty. Ár ánshi eki án oryndady. Farıda Saýythannyń dom­byramen oryndaǵan «Tamdy arýy», Bedja Kalmykovtyń «Baqyt qushaǵynda» ánderi kórermen kóńilinen shyqty. Kenjeǵalı Myrjyqbaı bastaǵan qa­zylar alqasynyń músheleri ár ánshiniń ónerine den qoıyp tyńdap, ádil baǵasyn berdi. Bas júlde Qaraǵandy oblysynan kelgen Farıda Saýythanǵa buıyrdy. I oryndy Ulytaý oblysynan Ádilet Ábilbaı, II oryndy Aqmola oblysynan Ermek Qasym, III oryndy Aqtóbe oblysynan Bedja Kalmykov pen Jambyl oblysynan kelgen Qymbat Jambylbek ıelendi.

Jezqazǵan qalasyndaǵy Bala­lar óner mektebinde ańyz­ǵa aınalǵan tulǵa Nurǵısa Tilen­dıevtiń 100 jyldyǵyna ar­nal­ǵan «Mýltıaspapshylar» respýb­lıkalyq baıqaýy ótti. Oǵan elimizdiń segiz oblysynan 11 daryndy jas qatysty. Qa­tysýshylar baıqaýdyń birinshi jáne ekinshi kezeńinde eki shyǵarmadan oryndady.

Etnomýzykant Edil Qusaıy­nov tóraǵa bolǵan qazylar alqa­synyń sheshimi boıynsha bas júldeni Sand­jaı Álmishev (Ulytaý oblysy) qan­jyǵasyna baılady. I oryndy Aıjan Quraq (Astana qalasy), II oryndy Ma­dına Osmanova (Astana qalasy), III oryn­dy Nazıra Omar (Pavlodar oblysy), III oryndy Aıhat Qazıhan (Aqmola oblysy) ıelendi. Biraz daryndy jastar dıplomant atandy.

«Ult uıasy – Ulytaý» atty aqyn­dar aıtysyn tamashalaýǵa kelgen halyq S.Qojamqulov atyndaǵy Qazaq mýzyka-drama teatrynyń zalyna lyq toldy.

Ulytaý óńiriniń halqy Qa­zaq­stan aıtys aqyndary men jyrshy-terme­shilerdiń halyq­aralyq odaǵynyń basqar­ma tóraǵasy Júrsin Erman bastaǵan aqyndardy qoshemettep qarsy aldy.

Júrgizýshi alaman aıtysqa at arytyp kelgen Tileýbek Janarys (Qaraǵandy), Batyrjan Kádirbaı (Atyraý), Darhan Ábdimanatuly (Taraz qalasy), Ularbek Mınat­han (Jetisý), Nurmahan Jaqyp­bek (Túrkistan), Nurlan Esen­qul (Shymkent qalasy), Syrym Nyǵyzbaı (Ulytaý), Rústem Qaıyr­taı (Abaı), Farıza Jetpis­baı (Astana), Nurmat Mansurov (Qyzylorda), Meıirbek Sul­tanhan (Astana), Jibek Shahmar­danqyzy (Arqalyq) syndy aqyndardy sahna tórine shaqyryp, tanys­tyrdy.

Ulytaý oblysynyń ákimi Dastan Ryspekov quttyqtaý sóz aıtyp, qazylar alqasynyń tóraǵasy Júrsin Ermannyń ıyǵyna Ulytaý jurtshylyǵy atynan shapan japty. Aıtysty ǵalym-fılolog, sýyrypsalma aqyn Amanjol Áltaev júrgizdi.

Osy joly aqyndardyń qata­ry jas­tarmen tolyǵypty. Aıtys­taǵy bir erekshelik aqyndarǵa osy óńirge qatysy bar «Ulytaý jáne Joshy ulysy», «Ulytaýdyń ulary – Jaqsygeldi», «Shynbolat pen Dúısenbaı – aıtystyń qos qanaty», «Tórlet eńbek adamy», «Qanysh – qazaq ǵylymynyń atasy», «Kákimbek – jez dala­nyń jezkıigi» dep atalǵan arnaıy taqyryptar berildi. Aqyn­dardyń keıbireýi berilgen taqy­rypty tereń qozǵady. Endi biri Ulytaý oblysyndaǵy jol, ekologııa, densaýlyq sııaqty shetin máselelerdi tilge tıek etti. Aqyndardyń arasynda túrli salada qyzmet isteıtinder bar. Astanalyq Meıirhan Sultan­hanmen aıtysqan Qytaı Halyq Respýblıkasynan atamekenge kóship kelgen jetisýlyq Ularbek Mınathannyń asaý ózendeı tasyǵan óleń uıqas­tarynan týǵan topyraqqa degen sheksiz súıispenshilikti sezindik. Aqyndar urymtal sózge utqyr jaýap berip, jurtshylyqty rıza qyldy.

Bas júldeni Rústem Qaıyrtaı (Abaı oblysy) jeńip aldy. I oryn­dy Nurlan Esenqulov (Shym­­kent qalasy), II oryndy Sy­rym Nyǵyzbaı (Ulytaý obly­sy), III oryndy Nurmat Mansu­rov (Qyzylorda oblysy) qanjy­ǵasyna baılady.

Aıtysta qazylar alqasynyń múshesi bolǵan, el ishinde «Dárı­dáı» aqyn atalyp ketken Mu­qash Seıtqazınov: «Ulytaý obly­synyń Jezqazǵan qalasynda úlken óner merekesi – «Ulytaý úni» ótýde. Bastaýyn ótken ǵasyr­dyń 90-jyldarynda alǵan bul óner dodasynyń men tuńǵysh júldegerimin. Ony búgin barsha aqyndar tilge tıek etip jatyr. Ol kezde Alǵyshat qana alatynbyz», deıdi.

«Ulytaý úni» respýblıkalyq fes­tıvaliniń gala-konsertinde festıval­da báıgeden ozyp, baǵy men baby jan­ǵan jas­tar óner kór­setti. Sonymen qa­tar uly­taý­lyqtar estrada jul­dyz­da­ry Tamara Asar, Móldir Áýel­bekova, Ush­qyn Jamalbektiń oryndaýyndaǵy án­derdi súısine tyńdady.

Áýelde oblystyq, keıin aı­maq­tyq, qazir respýblıkalyq mártebege ıe bolǵan «Ulytaý úni» festıvali – talaı daryndy jastyń talabyn ushtap, úmitin úkilep, qalaýyna qanat baılady.

Ulytaý oblysy