Sýretti túsirgen – Erlan OMAR, «EQ»
Is-shara aıasynda alǵashqy sózdi alǵan «Qazaq gazetteri» seriktestigi bas dırektorynyń orynbasary Qambar Ahmet jıynǵa qatysýshylarǵa bul is-sharanyń mańyzyn túsindirip, elimizdegi birneshe irgeli basylymnyń basyn qosyp otyrǵan ujym men Konstıtýsııalyq sot arasynda memorandýmǵa qol qoıylǵanyn, mundaı áriptestik baılanys Bas redaktorlar klýbynyń prezıdenti, Parlament Senatynyń depýtaty Bıbigúl Jeksenbaıdyń bastamasymen júzege asqanyn, búgingi jıyn Konstıtýsııalyq sottyń qyzmeti jóninde keńirek aqparat alýǵa múmkindik týǵyzatynyn jetkizdi.
Bas redaktorlar klýbynyń atqarýshy dırektory Bıbigúl Qulaman Konstıtýsııalyq sot pen Bas redaktorlar klýby arasyndaǵy baılanystyń nátıjesinde jýrnalısterge qajetti trenıngterdi ár ujymǵa baryp ótkizýge qol jetkizilgenin málimdedi.
«Buǵan deıin kóp jaǵdaıda jýrnalıster trenıngke ózderi baryp jatatyn. Dese de, jumys barysy qarbalas bolǵandyqtan, tilshilerimizdiń barlyǵyn birden trenıngke jibere almaıtynbyz. Árıne, tilshilerdiń bilimin jetildirý – bárimizge ortaq mindet. Sondyqtan da biz óz aıaǵymyzben kelip, jýrnalıstermen jıyn ótkizýdi qolǵa alyp jatyrmyz», dedi B.Qulaman.
Al Konstıtýsııalyq sot apparaty О́tinishterdi bastapqy qaraý bóliminiń basshysy Saltanat Nurymbetova 2022 jyly elimizde konstıtýsııalyq reforma jasalyp, Konstıtýsııalyq sot qurylǵanyn, 2023 jyldyń qańtar aıynan beri konstıtýsııalyq baqylaý organy Konstıtýsııaǵa sáıkes emes qandaı normalardy anyqtaǵanyn, qazir Konstıtýsııalyq sotqa bılik ókilderi ǵana emes, qarapaıym azamattar da ótinishpen qaıyryla alatynyn, tilshilerdiń Konstıtýsııalyq sot týraly jazarda qandaı máselelerge mán berý kerektigin túsindirdi.
«Bizdiń basty maqsatymyz – Ata zańymyzdyń, ıaǵnı Konstıtýsııanyń ústemdigin qamtamasyz etý. Iаǵnı elimizdegi búkil zańdar, ózge de normatıvtik aktiler Konstıtýsııaǵa sáıkes kelýi jáne oǵan qaıshy bolmaýǵa tıis. Sondyqtan da osy baǵyttaǵy jumystardy buqaraǵa nasıhattaý – bárimizge ortaq is», dedi Saltanat Musabekqyzy.
Konstıtýsııalyq sot taldaýshysy Nazgúl Tuıaqbaı Konstıtýsııalyq sotqa túsken ótinimderdiń qalaı qaralatynyn, bul organǵa qarapaıym azamattar qandaı negizde júgine alatynyn jýrnalısterge áńgimelep berdi.
