Atalǵan bilim oshaǵy «Keleshek mektepteri» ulttyq jobasy aıasynda salynyp, el ıgiligine berilgen bolatyn. Atalǵan mektepti bilikti ustaz Gúlmıra Esentaeva basqaryp keledi.
Jumys barysymen mekteptiń pedagog - uıymdastyrýshysy Arýjan Kárimqyzy tanystyrdy. Ata-analar da jýrnalıstermen birge ǵımaratty aralap kórdi. Mekteptiń 360 orynǵa arnalǵan ashanasy, 500 oryndyq májilis zaly talapqa saı. Keń de ásem sport zaly ornalasqan. Bastaýysh synyp bólmeleri de ádemi, jınaqy. Ár qabatta kovorkıng. Medısınalyq bólme, shyǵarmashylyq jumys bólmeleri jumys isteıdi. Hımııa, bıologııa kabınetteri de sońǵy úlgidegi qondyrǵylarmen jabdyqtalǵan. Kitaphanada 13 myń dana kitap qory bolsa, ádebı kórkem týyndylar 4020 danany quraıdy.
Eńbekke baýlý bólmesi uldarǵa bólek, qyzdarǵa bólek qamtylǵan. Qyzdardyń as daıyndaýyna arnalǵan bólme de bar. Kórkem eńbek pániniń muǵalimi Aızat Uzatova qyzdarǵa tiginshilikti qalaı úıretetinin baıandap berse, bıologııa pániniń muǵalimi Elmıra Tólepova az ýaqytta óziniń oqytý tásilinen habardar etti. Ár oqýshyǵa gıdroponıka, mıkroskobtar berilgenin aıtyp ótti. Qytaılyq qondyrǵynyń kómegimen qııar, qyzanaq ósirý joldaryn da oqýshylar úırenýde. Iаǵnı, ǵylymı joldyń negizi mektepten qalanyp jatyr.
«Ashylǵanymyzǵa bir jyl endi bolsa da, aýdan boıynsha úzdik 10 mekteptiń qataryna kirdik. Voleıboldan mekteptiń oqýshylar quramasy respýblıkalyq týrnırde top jardy. Jaǵajaı voleıbolynan da mektep shákirtteri jeńiske jetti. Fýtbol alańy, oıyn alańdary oqýshylardy qýanyshqa bóleıdi. Mektepte shahmat, fýtbol úıirmeleri jumys isteıdi. «Abaı oqýlary», «Muqaǵalı oqýlary» baıqaýlarynda da aýdandyq, oblystyq deńgeıde jaqsy nátıjege qol jetkizdik. 16 oqýshymyz oblystyq pán olımpıdasyna qatysyp, 4 oqýshy júldeli orynǵa ilikti. Munyń bári mektep muǵalimderi men qyzmetkerleriniń jumyla atqarǵan jumysynyń jemisi», deıdi atalǵan mektep dırektorynyń tárbıe isi jónindegi orynbasary Saıa Qalabaeva.
Jýrnalıstermen birge mektepti aralaǵan ata-ananyń jasy úlkeni 81 jastaǵy Salıha Esqaraeva. 4 nemeresi osy mektepte bilim alady eken. Ol kisi qazirgi múmkinshilikke kóńili tolyp, jastarǵa aq batasyn berdi.
«Meniń 1,2,4 oqıtyn balalarym osy mektepte oqıdy. Munda barlyq jaǵdaı jasalǵan. Oqý zaldary, májilis zaly, kitaphana kóńilden shyǵady. Keıde balalarymyz arqyly jazdyryp, ózimiz de mektepten ádebı kórkem kitaptar alyp oqyp júrmiz». deıdi jas ata-ana Shynar Asqarqyzy.
Atalǵan mekteptiń bıylǵy oqý jylyna ázirlegen josparlary da qomaqty. Mektep 600 oqýshyǵa arnalǵan. Oqýshylar memlekettiń qamqorlyǵyn sezinip osyndaı mektepte bilim alǵandaryna dán rıza.
Aıta ketý kerek, óńirde joba aıasynda búgingi kúnge deıin 4 mektep paıdalanýǵa berilgen, 3 mektep jyl sońyna deıin ashylady.
