Palata spıkeri sheshýshi saıysqa qatysý úshin barlyq óńirden kelgen shahmatshylardy quttyqtaı otyryp, Memleket basshysynyń tapsyrmasymen keıingi jyldary elimizde atalǵan oıyndy dáripteýge, kásibı jáne áýesqoı deńgeılerde damytýǵa tıisti jaǵdaı jasalyp jatqanyn atap ótti.
«Prezıdent Qasym-Jomart Toqaev shahmatty dáripteýge úlken mán berip keledi. Búginde Memleket basshysy aıqyndap bergen mindetter aıasynda bul baǵytta júıeli jumys júrgizilip otyr. Shahmatty damytýǵa arnalǵan 2027 jylǵa deıingi keshendi jospar ázirlenip, qabyldandy. Parlament Senaty men Qazaqstan shahmat federasııasy birlesip uıymdastyrǵan osy týrnır de – sol baǵytta jasalyp jatqan mańyzdy qadamdardyń biri. «Senat Open» saıysy osymen ekinshi jyl qatarynan ótkizilip otyr. Ýaqyt ótken saıyn saıysqa qyzyǵýshylardyń qatary artyp keledi. Mundaı jobalar ulttyń zııatkerlik áleýetin arttyrýǵa jáne memlekettik basqarý sııaqty mańyzdy salalarda qajetti qabiletterdi shyńdaýǵa jol ashady dep senemiz», dedi M.Áshimbaev.
Aıta keteıik, týrnırdiń alǵashqy kezeńi 21 aqpan men 27 mamyr aralyǵynda elimizdiń barlyq oblysynda ótti. Sonyń aıasynda 20 irikteý týry uıymdastyryldy. Ekinshi kezeńde óńirler boıynsha bes jartylaı fınal ótkizildi. Atap aıtqanda, bul synda qatysýshylar 25 maýsymda – Túrkistanda (Ońtústik), 29 maýsymda – Semeıde (Ortalyq), 4 shildede – Kókshetaýda (Soltústik), 23 shildede – Oralda (Batys) jáne 9 tamyzda Taldyqorǵanda (Shyǵys) ózara myqtyny anyqtady. Solardyń arasynan 215 shahmatshy fınalǵa joldama aldy.
О́z kezeginde Qazaqstan shahmat federasııasynyń prezıdenti Tımýr Týrlov osyndaı jobalar shahmatshylardyń kásibı sheberligin arttyrý, tájirıbe almasý jáne qatysýshylardyń kásibı baılanystaryn nyǵaıtý úshin tyń múmkindik ekenin tilge tıek etti.
«Qazirgi tańda bizdiń týrnırimiz turaqty túrde damyp, ilgerilep keledi. Bul – Parlament Senaty men Shahmat federasııasynyń birlesip atqarǵan jumysynyń naqty nátıjesi. Uıymdastyrýshylar men qatysýshylar osy jolda úlken jaýapkershilik pen tabandylyq tanytty. Biz úshin atalǵan joba erekshe mańyzǵa ıe. О́ıtkeni onyń aıqyn maqsaty jáne áleýmettik mıssııasy bar. Bul bastama kásibı baılanystar men jeke dostyqty nyǵaıtatyn alańǵa aınaldy. Sondaı-aq halyqqa josparlaý, qurmetteý, kóshbasshylyqqa umtylý sııaqty qundylyqtardy nasıhattaıtyn platforma retinde qalyptasty», dedi T.Týrlov.
Ashylý rásiminde aıtylǵandaı, shahmatty dáripteý aıasynda bıyl mektep baǵdarlamasyna jańa mádenıet pen analıtıkalyq daǵdylardy qalyptastyrýǵa jáne jan-jaqty damýǵa yqpal etetin «Shahmat negizderi» páni engizilgen. Atalǵan bastama 60 myńnan asa oqýshyny qamtymaq.
