Agenttik tóraǵasy Darhan Jazyqbaı óziniń quttyqtaý sózinde: «Bıyl Konstıtýsııamyzǵa 30 jyl tolyp otyr. Osy ýaqyt aralyǵynda Ata zańymyzǵa sáıkes elimizdiń quqyqtyq, demokratııalyq, zaıyrly, áleýmettik memleket retinde irgesi bekidi. Birlik, teńdik, adam quqyqtary men bostandyqtary syndy qaǵıdattar berik ornyǵyp, otanymyzdyń damýdaǵy basty baǵdary retinde aıqyndaldy. Sońǵy jyldary Memleket basshysynyń tikeleı bastamasymen júzege asyrylǵan konstıtýsııalyq reformalardyń nátıjesinde elimizde jan-jaqty demokratııalandyrý úrdisi oryn alyp, memlekettik basqarýdy jańǵyrtýǵa jańasha múmkindikter jasaldy. Adam quqyqtary jónindegi ýákildiń jáne quqyq qorǵaý ınstıtýttarynyń mártebesi artty» - dedi.
Sondaı aq, Darhan Jazyqbaı: «Konstıtýsııalyq Sot qaıta qurylyp búginde bul uıym Ata Zańymyzdyń ústemdigin ornyqtyrýshy yqpaldy ınstıtýtqa aınaldy. Osylaısha ádiletti qoǵamnyń negizi sanalatyn zań men tártipti, teń múmkindikterdi qamtamasyz etýdegi Konstıtýsııanyń róli arta tústi. Júzege asyrylǵan konstıtýsııalyq reformalardy jańa qoǵamdyq kelisim deýge tolyqtaı negiz bar. Onda «Halyq únine qulaq asatyn memleket» tujyrymdamasy aıqyn kórinis tapty. Bul ata zańymyzdaǵy ustanymdardy túbegeıli ózgertken, sapaly jańǵyrtý boldy» - dep atap ótti.
Sonymen qatar Agenttik tóraǵasy memlekettik qyzmetshiler úshin Ata Zańmen aıqyndalǵan qundylyqtardan aınymaı, Ádiletti Qazaqstan qaǵıdalaryna saı ashyq, ádil, adal bolyp, júktelgen mindetti sapaly atqarýdyń mańyzy zor ekenin jáne konstıtýsııada aıqyndalǵan qaǵıdattardy berik ustaný, ony qurmet tutý otanyn súıetin ár azamattyń qasıetti paryzy ekenin aıtty.
Shara aıasynda laýazymdyq mindetin úlgili atqarǵan memlekettik qyzmetshiler men Qazaqstan Respýblıkasy Prezıdenti janyndaǵy Memlekettik basqarý akademııasynyń professorlyq-oqytýshylyq quramyna «Qazaqstan Respýblıkasynyń Konstıtýsııasyna 30 jyl» merekelik medali jáne Agenttik tóraǵasynyń alǵys hattary tabystaldy.
