Foto: Erlan Omar
Tekserý barysynda belgili bolǵandaı, sot oryndaýshylary eki jyl boıy memleket qazynasyna túsýi tıis qarajatty ıemdenip, óz ókilettikterin teris paıdalanǵan. Jınalǵan qarjy jeke qajettilikterge, sonyń ishinde qumar oıyndarǵa jumsalǵan. Buǵan qosa, jeke jáne zańdy tulǵalardyń qarajattary da jymqyrylǵan.
«Jalpy shyǵyn 26 mln teńgeden asty. Sot oryndaýshylaryna qatysty sotqa deıingi tergeý amaldary bastalyp, keıin olar keltirilgen shyǵyndy tolyǵymen ótedi. Tergeý nátıjeleri boıynsha ýákiletti organ olardy lısenzııalarynan aıyrý jóninde sharalar qabyldaıdy», delingen habarlamada.
Qala prokýratýrasynyń habarlaýynsha, ýákiletti organga bolashaqta mundaı quqyqbuzýshylyqtardyń aldyn alý úshin qaryz somasyn tikeleı óndirip alýshylarǵa aýdarý jáne atqarýshylyq sanksııalardy esepteý prosesinde jasandy ıntellektti qoldaný usynylǵan.
