Osy rette fýtbol jankúıeri ári «Qaırattyń» naǵyz fanaty retinde Májilis depýtaty, aqyn, jýrnalıst Janarbek Áshimjanovty Parlament palatalarynyń birlesken otyrysynan keıin kýlýarda kezdestirip, sózge tarttyq. Almatyda ótken sheshýshi match pen jýyrdaǵy jerebe tartý rásiminen alǵan áserin bólisýdi suradyq.
«Men Almatynyń «Qaıratyna» sonaý bala kúnimnen, naqty aıtqanda jeti-segiz jasymnan jankúıermin. Kezinde aýylda júrgende osyndaǵy aǵalaryma qolqa salyp, Almatyǵa kelip oıyndaryn Ortalyq stadıonnan qaraıtynmyn. Odan keıin Almaty qalasynda ótken stýdenttik jyldardan bastap men «Qaırattyń» úıdegi bir de bir matchyn jibergen joqpyn. Ortalyq stadıonǵa baryp turyp jankúıer bolatynmyn. Osy jolǵy Chempıondar lıgasyndaǵy oıyndarynyń barlyǵyn túngi ýaqytta ótkenine qaramastan muqııat baqylap, oıyn aldynda saraptama jasap, statıstıkalyq kórsetkishterdi qarap júrdim. Ásirese, «Olımpııa», «Slovan» klýbtarymen bolǵan oıyndar, onyń ishinde syrt alańdaǵy oıyndarda kóńil tolqıtyn sátter kóp boldy», deıdi J.Áshimjanov.
Ol sarapshylardyń toptyq kezeńge shyǵýǵa joldama bergen «Seltıkpen» bolǵan syrt alańdaǵy teń oıyndy jeńiske parapar dep baǵalaýyna qosylatynyn jetkizdi.
«Glazgodaǵy oıynnan keıin-aq «Seltıktiń», syrt alańdaǵy «Qaırattyń» oıynynan keıin Búkilálemdik fýtbol qaýymdastyǵy, Halyqaralyq fýtbol qaýymdastyǵy «Qaıratqa», onyń oıynshylaryna moıyn buryp jatty.
Sebebi «Seltık» Shotlandııanyń 55 márte chempıony bolǵan keshegi top komandalardyń biri ǵoı. Bul klýb osynyń aldynda ǵana «Bavarııamen» ótken oıynda 2:2 esebimen teń túsip, qandaı oıyn kórsetti. Aınaldyrǵan alty aıdyń ishinde sol «Seltıkke» qaırat kórsetken bizdiń Almatynyń «Qaıraty» erekshe kóńil tolqytty. Ol bizdiń qazaq fýtbolyndaǵy tarıhı sátter bolyp qala bermek. Bul jeńis qoǵamdyq sıpat alyp, fýtboldyń áseri, jankúıerlerdiń kóńil tolqynysy áli de úlken talqylaýlarǵa, jaqsy kóńil kúılerge ulasyp jatyr. Bul «Qaırattyń» ǵana emes, jalpy qazaq fýtbolynyń tarıhı sáti. Bir kezeńderde bundaı jetistikke osydan on shaqty jyl buryn Astananyń «Astana» komandasy qol jetkizgen. Endi mine «Qaırat» klýby úlken beleske shyǵyp otyr. Bul bizdiń qazaq fýtbolynyń, qazaq jankúıerleriniń, ásirese, «Qaırat» jankúıerleriniń de úlken belesi», dedi Janarbek Áshimjanov.
Ol Chempıondar lıgasynyń jerebe tartý rásimin tikeleı efırden kóz jibermeı qaraǵanyn aıtty. Sondaı-aq «Qaıratqa» kelesi qarsylas bolǵan klýbtardyń qaı-qaısysy da osal emes ekenin ashyp aıtty.
«Álemniń eń juldyzdy komandasy «Real Madrıd», Londonnyń «Arsenaly», Mılannyń «Interi», odan keıingi grekııalyq «Olımpıakos» bolsa da, Belgııanyń «Brıýggesi» de, «Qaıratpen» qatar tarıh jasaǵan «Pafos» ta ońaı shaǵylatyn jańǵaq emes. Álemniń top-komandalarynan mindetti túrde ne «Barselona», ne «Bavarııa», ne «PSJ», Madrıdtiń «Realy» bolsyn áıteýir bireýiniń túsetini aıqyn edi. Biraq «Real Madrıdtiń» bizge keletini erekshe kóńil tolqytty. Sondyqtan óte bir tartysty da qyzyqty match bolǵaly tur», deıdi Májilis depýtaty Janarbek Áshimjanov.
Onyń aıtýynsha, ÝEFA-nyń qazirgi erejesi saı ótetin oıyndar da tartysty ótetin syńaıly. Syrt alańda qıynǵa soqqanymen, «Qaırattyń» óz alańymyzda upaı alý múmkindikteri bar kórinedi.
««Qaırat» tórt ret syrt alańda, tórt ret óz alańynda kezdesedi. Qonaqtaǵy oıyndardyń ońaı bolmasy anyq. Alaıda ózimniń joramalym boıynsha Almatyda «Olımpıakos» pen «Pafostan» da upaı alýǵa bolady. Sóıtip taǵy bir teń oıyndarmen kemi 7-8 upaı alamyz-aý degen úmittemin. Al Almatynyń ortalyq alańyndaǵy «Real Madrıdpen» ótetin match búkil álem qulaq túrip, kóz tigetin kezdesý bolǵaly tur. Jalpy, qaı oıyndy alsaq ta ońaıǵa soqpaıdy», deıdi J.Áshimjanov.
Rasynda «Real Madrıdpen» bolatyn oıynnyń dýy da dýmany da basymyraq ekeni áý bastan belgili. Koroldik klýbtyń da Alataý baýraıyndaǵy jasyl alańda baryn salatyny anyq. О́ıtkeni bul kezdesý bastapqy týrlardyń biri bolǵandyqtan olarǵa da úsh upaı alý asa mańyzdy bolyp tur. Sol sebepti komanda sapyndaǵy Mbappe, Vınısıýs, Kýrtýa, Karvahal, Bellıngem, Valverde, Rodrıgo, Gúler, Aleksandr-Arnold syndy álemdik fýtbol juldyzdarynyń bári bolmasa da basym bóliginiń Almatyǵa at izin salatyny anyq. Al «Qaırat» álemdik fýtbol alpaýytyna qanshalyqty qarsylyq tanytatynyn ýaqyt enshisine qaldyraıyq. Sońǵy oıynynda álem nazaryn ózine aýdarǵan almatylyq klýb taǵy da sensasııa jasaı alar ma eken?
«Esterińizde bolsa kezinde Reseıdiń premer-lıgasyndaǵy Tatarstannyń «Rýbın» komandasy «Barselonamen» teń oınap, búkil álemdi tańǵaldyrǵan. Tipti jeńgen de sáti boldy. Sondaı bir sensasııalar bizde de bolýy ábden yqtımal. Italııanyń «Interi» de osal emes. Londonnyń «Arsenaly» da jeńiske umtylyp tur. О́tken joly «Brıýgge «Reındjersti» qalaı talqandady. Sondyqtan qaı-qaısysymen bolǵan oıyn «Qaırat» úshin úlken halyqaralyq tájirıbege jol ashsa, ekinshiden qazaq fýtbolynyń deńgeıin kóterýge sep bolmaq», degen J.Áshimjanov kórshi ózbek aǵaıynnyń da Álem birinshiliginiń fınaldyq kezeńine joldama alǵanyn erekshe qýanyshpen qabyldaǵanyn atap ótti.
«О́zbekstannyń fýtboldan ulttyq quramasynyń fınaldyq kezeńge shyqqan oıynyn Máskeýde issaparda júrip qarap otyrdym. О́zimizdiń baýyrlas, kórshi el retinde ózbekter úshin óte qatty qýandym. Sol kezde ózbek fýtbolyna álem qalaı súısinse, keshe de bizdiń «Qaıratqa» qatysty da jahandyq aqparat quraldary az jazbady. Bul jerebe de ońaı túsken joq. Al «Qaırat» sol jerebege deıingi joldy óte laıyqty júrip ótti. О́z alańymyzda da, syrt alańda da bizdiń fýtbolshylarymyz sheberlikterin kórsetti», dep sózin túıindedi Májilis depýtaty.
Jalpy, «Qaırattyń» osy Chempıondar lıgasy jolyndaǵy jeńisti joryǵy álemdik aqparat quraldarynyń ǵana emes, fýtbol mamandarynyń, skaýttardyń da qyzyǵýshylyǵyn týǵyzbaı qoımady. Ásirese Londonnyń áıgili «Chelsı» klýbymen kelisimshart jasap úlgergen Dastan Sátbaevtyń sheberligi jıi aıtylyp júr. Al qaqpashy Anarbekov almatylyqtardy ǵana emes, kúlli Alashty baqytqa bóledi. Al onyń oıyn kezindegi keremet seıfteri men penaltıler serııasyndaǵy úsh soqqyny qaıtarǵan ákkiligi de skaýttardyń nazaryn ózine aýdarmaı qoımasy anyq. Kelesi óter oıyndarda da ol óziniń sheberligin dáleldeı tússedi degen senimdemiz. Erkin Tapalov ta qorǵanysta tasqamal ekenin tanytyp keledi. Buıyrtsa, Dastannyń izin ala taǵy da talanttarymyz jahanǵa tanylar degen úmit bar.
