«Biz jaz boıy elimizdiń ár óńirin aralap, halyqpen júzdesip, olardyń muń-muqtajyna, kókeıdegi máselelerine qulaq túrdik. Bul sapar tek kezdesý maqsatynda emes, naqty problemalardy zerttep, sheshý joldaryn qarastyrý úshin uıymdastyryldy. О́zim Astana qalasy men Aqmola oblysyn aralaý barysynda qoǵamda sheshimin tabýdy qajet etetin birqatar ózekti máseleni nazarǵa aldym.Sonyń biri – áleýmettik jelilerdegi zańsyz utys oıyndary men lotereıalar. Sonymen qatar «ońaı tabysqa jetý» ıdeologııasyn nasıhattaıtyn kýrstar men trenıngterdiń kóbeıip, olardyń qoǵamǵa keri áser ete bastaǵanyn anyq baıqadym. Bul – qazirgi tańda jalpy halyqtyń alańdaýshylyǵyn týdyryp otyrǵan úlken problema», dedi G.Shıpovskıh.
Senatordyń sózinshe, búginde keı blogerler men ınflıýenserler zańdy belden basyp, ashyq túrde túrli GIF, utys oıyndary, marafondar men jalǵan kýrstar uıymdastyryp, jurtshylyqty «tez ári ońaı baıytamyn» degen jeleýmen jurtshylyqty aldap, materıaldyq paıda tabýǵa kóshken.
«Mundaı qubylystyń saldary tek qarjylyq shyǵynmen shektelmeıdi. Eń qaýiptisi – jastardyń sanasy birtindep ýlanyp jatyr. Adal eńbekke degen qurmet tómendep, onyń ornyna jalǵan jyltyr ómirge sený, shynaıy qundylyqtardan alshaqtaý tendensııasy beleń alyp barady. Buryn «eńbekpen tapqan nan – tátti» degen ustanym urpaq tárbıesiniń ózeginde tursa, qazir áleýmettik jelidegi «aýa satyp, aqsha tabý» ıdeologııasy ornyn basqan. Bul – óte qaýipti baǵyt. Al biz, kerisinshe, naqty eńbekke, jumysshy mamandyqtarǵa degen qurmetti arttyrý úshin naqty qadamdar jasap álekpiz. Máselen, bıyl jumysshy mamandyqtary jyly dep jarııalandy», dedi Senat depýtaty.
Depýtat óz sózinde qazirgi kúmándi kýrstar men trenıngterdiń esh ǵylymı negizsiz, manıpýlıasııaǵa qurylǵanyn basa aıtty. Onyń pikirinshe, mundaı qyzmet túrlerin zań júzinde shekteý – ýaqyt talaby.
«Jaqynda áleýmettik jelide bir otbasy kólik oınatyp, oǵan qatysý úshin adamdardy arnaıy kýrsqa jazylýǵa májbúrlegeni týraly aqparat tarady. Bul – klassıkalyq manıpýlıasııa. Mundaı tásilder qoǵamnyń quqyqtyq qaýipsizdigine tikeleı nuqsan keltiredi. Taǵy bir mysal, áleýmettik jeli belsendisi zańsyz jarnama jasap, bes márte ákimshilik aıyppul arqalaǵanyna qaramastan, sol áreketin jalǵastyryp otyr. Bul neni bildiredi? Demek, keıbir azamattar úshin ákimshilik jaza toqtaý emes, jaı ǵana «formaldylyq» bolyp qalǵan», dedi G.Shıpovskıh.
Osyǵan baılanysty Qarjylyq monıtorıng agenttigimen birlesip arnaıy depýtattyq saýal ázirlengen. Onda áleýmettik jelidegi zańsyz utys oıyndary men jarnamalarǵa qatysty qylmystyq jaýapkershilik engizý týraly naqty usynystar qamtylǵan.
«Halyq arasynda «Aıýǵa namaz úıretken – taıaq» degen sóz bar. Biz de qoǵamnyń sanasyna teris áser etetin mundaı zań buzýshylarǵa naqty ári tıimdi quqyqtyq tetik qoldanýymyz qajet. Ákimshilik aıyppul bul zańbuzýshylardy toqtata almaı otyr. Kerisinshe, olar aıyppulyn tólep, zańsyz áreketin jalǵastyra beredi. Sondyqtan qaıtalanatyn quqyqbuzýshylyq úshin qylmystyq jaza qoldaný qajet. Bul – ýaqyt kúttirmeıtin másele», dedi senator.
Onyń aıtýynsha, bul bastama aldaǵy jalpy otyrysta talqylanyp, tıisti memlekettik organdarǵa joldanady. Sonymen qatar, bul túıtkildi másele sarapshylardyń pikiri negizinde de qaralady.
«Jańa Qazaqstan – ádiletti zańdarmen ǵana emes, adal eńbekke negizdelgen mádenıetpen, shynaıy qundylyqtardy dáripteıtin azamattarmen qalyptasýǵa tıis. Biz osyǵan senemiz jáne sol baǵytta júıeli túrde jumys isteýdi jalǵastyramyz», dep sózin túıindedi Gennadıı Shıpovskıh.
