Depýtattyń aıtýynsha, bıyl shilde aıynda Qazyǵurt, Saryaǵash, Keles, Jetisaı jáne Maqtaaral aýdandary turǵyndarymen kezdesýlerde birqatar ótkir máseleler kóterilgen. Sonyń ishinde eń kúrdeli másele – Saryaǵash aýdanyndaǵy Kókterek kentiniń káriz júıesiniń apatty jaǵdaıy.
«1984 jyly salynǵan káriz júıesi búginde tolyq tozǵan. Nátıjesinde 60 shıpajaı men myńnan astam úıdiń kárizi isten shyqqan. Bul kórshiles el men jergilikti halyqqa ekologııalyq qaýip tóndirip tur. Sasyq sýlar Keles ózenine jetýi múmkin, al ol ózenniń sýyn 600 myńnan astam adam paıdalanyp otyr», dedi Qyryqbaev.
Ákimdik ázirlegen jobalyq-smetalyq qujattama memlekettik saraptamadan ótip, oń qorytyndy alǵan. Jobanyń quny – 1,9 mlrd teńge. 2025 jylǵa oblystyq bıýdjetten 191,6 mln teńge bólingenimen, jumysty tolyq aıaqtaý úshin respýblıkalyq bıýdjetten qosymsha 1,3 mlrd teńge qajet.
Sonymen qatar, Qazyǵurt pen Saryaǵash aýdandarynda aýyz sý júıeleri qurylysynyń alty nysany bastalǵan. Olardy aıaqtaý úshin 2025 jyly respýblıkalyq bıýdjetten 7,4 mlrd teńgeden astam qarjy qarastyrý qajet. Onyń ishinde Qazyǵurt aýdanynyń Altyntóbe aýyldyq okrýgi, Saryaǵash aýdanyndaǵy Qurkeles aýyldyq okrýgi men Samal-3 shaǵynaýdany, sondaı-aq Aqjar aýyldyq okrýgindegi jobalar bar.
Depýtat Maqtaaral aýdanyndaǵy jaǵdaıdy da erekshe atap ótti. Aqjol, Araıly, Igilik jáne Myrzakent aýyldaryndaǵy aýyz sý júıelerin qaıta qurý úshin shamamen 2,8 mlrd teńge qajet.
«Aýyz sý tapshylyǵy halyqtyń narazylyǵyn týdyrýmen qatar, «AMANAT» partııasynyń saılaýaldy baǵdarlamasynda kózdelgen ınfraqurylymdyq mindetterdiń ýaqytyly oryndalýyna kedergi keltirýi múmkin», dedi Temir Qyryqbaev.
