Ǵylym jáne joǵary bilim mınıstrliginiń til saıasaty komıteti men Túrkistan oblysy ákimdigi birlese uıymdastyrǵan baıqaýǵa 15 óńirden irikteýden ótken memlekettik qyzmetshiler qatysty. Olar úsh kezeń boıynsha baq synady. Birinshi kezeńde qatysýshylar qazaq tilindegi kónergen sózderdiń maǵynasyn ashsa, ekinshi kezeńde orys tilinde elimizdiń óńirleri men ulttyq qundylyqtary týraly suraqtarǵa jaýap berdi. Al úshinshi kezeńde aǵylshyn tilinde Qazaqstannyń uly tulǵalary men ulttyq dástúrleri týraly tanymdyq taqyryptardy túsindirip berdi.
Qazylar alqasy quramyndaǵy úsh tildi meńgergen fılolog ǵalymdar men túrli sala mamandary qatysýshylardyń tilderdi meńgerý deńgeıi men kásibıligin joǵary baǵalady. Baıqaýdyń tartysty ótkenin aıtyp, barlyq qatysýshyǵa alǵysyn bildirdi. Baıqaý qorytyndysy boıynsha I oryndy Ardaq Nurǵazy (Almaty qalasy), II oryndy Nurhat Berdibek (Qyzylorda oblysy), III oryndy Raýan Jaqsan (Qostanaı oblysy) men Dáýletjan Muhanbetqalıev (Oral qalasy) ıelendi. Yntalandyrý syılyǵy Rınat Bekmuhanbetke (Atyraý oblysy), Slambek Muqashev (Almaty oblysy), Sultan Berdibek (Túrkistan oblysy), Álııa Jantaeva (Aqmola oblysy), Madııar Beısalyǵa (Ulytaý oblysy) tabys etildi.
