Merekelik keshtiń shymyldyǵy qazaq rýhanııatynyń aınymas rámizindeı bolǵan «Atameken» ánimen ashyldy. El men jerge degen perzenttik mahabbatty asqaqtatqan bul shyǵarma Qaırolla Jumakenov atyndaǵy úrlemeli orkestrdiń súıemeldeýinde kórermenge erekshe shabyt syılap, kameralyq hor men ánshi Almas Nursáttiń oryndaýynda sheber shyrqaldy.
Konsert barysynda júrgizýshiler Konstıtýsııanyń el damýyndaǵy mańyzyn tarıhı derektermen ushtastyra baıandap, zań men tártiptiń qoǵamdaǵy ornyn aıqyndaı otyryp, keshtiń ıdeologııalyq tuǵyryn nyǵaıtty.
Án men kúıdiń alýan boıaýynan quralǵan baǵdarlamada 17 túrli nómir oryndaldy. Olardyń árqaısysy elimizdiń mádenı baılyǵy men rýhanı qýatyn pash etken shyǵarmalar edi. «Ata zań áni» (oryndaýshysy Ádil Sultan), «Týǵan el» marshy, Seıdolla Báıterekovtiń «Qazaqstan» áni syndy shyǵarmalar elge degen súıispenshilikti oıatty. Halyq ánderinen quralǵan «Iаpýraı-Qamajaı» popýrrıi ulttyq murany el jadynda jańǵyrtty.
Konsertte dombyrashy Muhıt Salybekov halyq kompozıtory Qurmanǵazynyń «Adaı» kúıin tartqanda dombyra úni úrlemeli orkestrmen utymdy úılesip, kórermenderdiń janyn baýrap, júregin jaýlap keshtiń kórkemdik deńgeıin kóterip-aq tastady. Sonymen qatar kesh qonaqtarynyń biri – Qazaqstannyń eńbek sińirgen qaıratkeri Bıbigúl Januzaqtyń oryndaýyndaǵy «Qaıyqta» áni názik lırızm men ulttyq romantıkany úılestire tústi. Odan ári Abaı Qunanbaıulynyń 180 jyldyǵyna arnalǵan «Boıy bulǵań» áni oryndaldy.
Bıylǵy Jumysshy mamandyqtary jyly aıasynda da konsertte eńbek adamynyń róli umyt qalmady. Merekelik keshte tyńdarman nazaryna usynylǵan «Qazaq eli», «Qazaqstan jastary», «Svetı, zemlıa moıa», «Baqyt degen», «Elimniń júregi – Astana» sııaqty túrli janr jáne tildegi shyǵarmalar konserttiń úılesimdilik pen ózara túsinistikti arttyrýǵa qosqan úlesindeı. Keshtiń fınalynda oryndalǵan «Atameken» áni halyqtyń birligin, tutastyǵyn jáne elge degen uly mahabbatyn ulyqtaǵandaı.
Keshtiń kórkemdik jetekshileri – N.Pochıtalın (úrlemeli orkestr), D.Sataeva (estradalyq vokal bólimi), R.Shotqalıeva (klassıkalyq vokal bólimi) syndy bilikti mamandar óz salasynyń maıtalmandary ekenin taǵy bir dáleldedi. Bul kesh arqyly kórermen ásem án-kúıge bólenip qana qoımaı, eliniń tarıhy men mádenıetine taǵy bir úńile tústi.
Baǵdat Baıjantaev,
Erkeǵalı Rahmadıev atyndaǵy Memlekettik akademııalyq fılarmonııanyń bas redaktory
