Mádenı-sport kesheninde murajaı, kitaphana, kórme zaly, ashana, konferensııa zaly, sport ortalyǵy, sportshylar kıim aýystyratyn jáne basqa da qajetti bólmeler qarastyrylǵan. 148 oryndyq amfıteatr stılinde salynǵan keshende aýyldyq, aýdandyq, oblystyq jáne respýblıkalyq deńgeılerde kúrestiń kásipqoı jáne olımpıadalyq túrleri: erkin kúres, dzıýdo, qazaqsha kúres, sambo kúresinen jarystar ótkizýge múmkindik jasalǵan. Halyqaralyq avtojol boıynda salynǵan zamanaýı keshende týrıster úshin de barlyq jaǵdaı qarastyrylǵan. Ǵımarat ishindegi 138 oryndyq konferensııa zaly, 48 oryndyq ashana men 126 adamǵa laıyqtalǵan shaǵyn kórme zaly, kitaphana týrıster úshin táýlik boıy qyzmet kórsetedi.
– Mádenı-sport kesheniniń ashylýy – óńirimizde sport pen mádenıetti, sonymen qatar týrızmdi damytýǵa jasalǵan mańyzdy qadam. Qazaq batyry Qajymuqan Muńaıtpasovtyń esimi berilgen bul keshen tek sport pen mádenıettiń orny ǵana emes, sonymen qatar babamyzǵa degen qurmettiń belgisi. Balýan babamyz ómiriniń sońǵy kezderin osy mekende ótkizgen. Onyń kesenesi de osy aýmaqta ornalasqan. Bul ıgi bastama babamyzdyń sporttaǵy uly jetistigin urpaqqa úlgi etýge baǵyttalǵan, – dedi nysannyń ashylý saltanatynda oblys ákimi Nuralhan Kósherov.
Bes gektar aýmaqta ornalasqan, 3 ǵımarattan turatyn keshenniń jalpy aýdany – 3 622 sharshy metr. Joba quny – 1,3 mlrd teńge.
