Keshegi «Aldyńa kelse, atańnyń qunyn kesh...» deıtin kesek minezdi qazaqtyń búgingi urpaq-jurnaǵy, biz qandaımyz?
Osyndaıda el ishinde bolǵan myna oqıǵa esimizge oralady. Aǵaıyndardyń aty-jónin aıtýdy jón kórmedik.
... О́zara renjisip júrgen aǵaıyndy eki jigit bir-birimen ýatsap arqyly sóılesip otyr.
Biri ózinen jasy kishi baýyryna keshirim berýdiń, keshirimdi bolýdyń úlken saýapty is ekenin aıta kelip, «bul ómirde máńgi júrmeımiz, ýaqyty kelgende ketetin pendemiz. Bir-birine kiná artqan adamdar erteń biri o dúnıege attanǵanda «keshirdim, keshirdim» dep jylap-syqtap, meıirim tanytyp jatady. Biraq odan ne paıda?.. Bári kesh bolady. О́stip tiri júrgende bir-birimizge keshirimdi bolmasaq, ólgennen keıin bergen keshirim ádire qalsyn» degen jazbasyn, sondaı-aq oǵan qosymsha bir ımamnyń atalǵan taqyrypqa qatysty beıne ýaǵyzyn da joldaǵan.
Bul hat-jazbany oqyǵan baýyry munda ne meńzelip, ne ısharat turǵanyn sana sarabyna sala kelip, «ol meniń keshirim suraýymdy qalap, ne talap etip tur» dep oılady. Bul az-kem únsiz otyrdy da óz pikirin bylaı dep tańbalady: «Iá, bir-birimizdi ólgen soń ǵana keshirip jatamyz, bul eski ádet. Onyń ómirsheń bolýynyń sebebin uqpaı kelemiz. Ol ne sebep deısiz be? Aıtaıyn, óz kinámizdi túsinbeımiz, bilgenniń ózinde menmendikpen moıyndamaımyz. Sodan kelip arada keshirim suralmaıdy. Al Táńir sanalyǵa ómirden ozǵannan soń emes, tirshilikte, tiri júrgende keshirim suraýdy, keshirim berýdi buıyrady. Osynaý buıryqty oryndaýǵa óre jetpese, tákapparlyq jibermese, berilgen úlken múmkindikti kórmese, qaıtpekpiz? Árıne, aldyńda jazyqty bolǵan jan ólgen soń oǵan keshirimshil bola qalamyz... Keshirim berý úshin, aldymen keshirim suralý kerek qoı».
Taqyrypty birinshi bolyp qozǵaǵan jigit baýyrynyń ózine jibergen hatynan «sen aldymen menen kelip keshirim sura, sen kinálisiń...» degen oıdy birden uqty. Yzasy keldi, shytynap ketti. Degenmen, ózdi-ózin basyp, sabyrǵa keldi. Oılanyp qaldy.
Ekeýi de ózara renishtiń neden bastalǵanyn qaıta-qaıta oı elekterinen ótkizdi. Sondaǵysy arzymaıtyn nárse, tipti, aıtýǵa uıat... Olar ózderine min taqpady, esh kiná qoımady. Birin-biri ishteı kinálaýdan ózge oılaryna eshteńe kirmedi. Ekeýi de «men emes, ol kináli» deýmen boldy. Menmendik boıdy bılep turǵanda kishipeıil bolýǵa, keńdik jasaýǵa shama qaıdan kelsin?
Arada biraz ýaqyt ótti. Biri ómirden ozdy. Tiri júrgeni baqıǵa ketkendi keshirdi. Qabir basynda «keshir» demedi, «keshirdim, keshirdim» dedi, ózin kinálaǵysy kelmeı, ony jazyqty sanaýyn qoımaı. Qystyǵa jylady. Áıteýir bir kezde «eger men kináli bolsam, keshir» dep aıtty-aý aqyry. Biraq bári kesh edi...
