Mádenı is-sharanyń ashylýynda Prezıdenttik ortalyqtyń dırektory Baqytjan Temirbolat qylqalam sheberiniń shyǵarmashylyǵy týraly jyly lebizin bildirdi.
«Búgingi kórmege dástúrli ult ónerin zamanaýı kórkemdikpen úılestirgen Anar Áýbákir 35 jańa týyndysyn usynyp otyr. Bul eńbekterinde ol Abaıdyń fılosofııalyq ıdeıasy men aǵartýshylyqqa umtylysyn qaıta paıymdap, tereń oı túıedi», dedi ol.
Jalpy, kórmege avtordyń bas-aıaǵy alpystan astam jumysy qoıylǵan. Onyń shyǵarmashylyǵynyń bir ereksheligi – medıtasııalyq tájirıbe men kórkemdik zertteýlerdiń sıntezine negizdelgen. Árbir keskindemesi aıshyqty. Adamdy fılosofııalyq oıǵa tartady. Sondaı-aq sheberdiń kıizden jasaǵan dúnıeleri, kıimderi, oıý-órnekteri jáne basqa da turmys zattary da kesteli bederlengen. Aıtalyq, «Qapsyrma» kartınasy men «Sarymaı» ınstallıasııasy – «qos obraz» qaǵıdasymen órilgen.
Kórme barysynda sýretshi óz týyndylarynda Abaı ıdeıasynyń búgingi tańda da ózektiligin kórsetkisi kelgenin aıtty.
«Hakim atamyzdyń «Qarasózderi» adamǵa shabyt syılaıdy. Men úshin Abaı – tarıhı tulǵa ǵana emes, ol – bizdi jáne qorshaǵan álemdi túsinýge kómektesetin danalyqtyń qaınar kózi», deıdi avtor.
Búginde kórme ıesiniń esimi elimizge ǵana emes, alys-jaqyn shetelge de tanymal. Birqatar týyndylary Germanııa, Reseı, Tatarstan mýzeıleri men jeke kolleksııalarynda saqtaýly tur. Halyqaralyq kórmelerdiń turaqty qatysýshysy. Bir sózben aıtqanda, Anar Áýbákirdiń kórmesinen ulttyq dástúrdi saqtaı otyryp, qazirgi zamanaýı ónerdiń kókjıeginen jol izdegen izdenisti baıqadyq.
