Foto: Qyrmyzy Jumaǵalıqyzy
Joba sheńberinde barlyǵy 655 alǵashqy medısınalyq-sanıtarııalyq kómek kórsetý nysanyn salý josparlanǵan. Onyń ishinde 540 ǵımarat paıdalanýǵa berildi, al qalǵan 115-i jyl sońyna deıin aıaqtalady. Sonyń nátıjesinde shamamen 200 aýylda alǵash ret medısınalyq pýnktter men ambýlatorııalar ashylyp, turǵyndar sapaly qyzmetke qol jetkizgen.
Vıse-mınıstrdiń aıtýynsha, 346 nysan eski ǵımarattardyń ornyna turǵyzylǵan, al 194 jańa nysan buǵan deıin medısınalyq ınfraqurylym bolmaǵan eldi mekenderde salynǵan. Joba aıasynda 260 medısınalyq pýnkt, 235 feldsherlik-akýsherlik pýnkt jáne 160 dárigerlik ambýlatorııa boı kóteredi. Barlyq nysan biryńǵaı standartpen jabdyqtalyp, telemedısına, fızıoterapııa kabınetteri, dárihana bólimsheleri men emdik dene shynyqtyrý zaldaryn qamtıdy. Qajetti qural-jabdyqtardyń 70%-dan astamy otandyq óndiristen qamtamasyz etiledi.
Sonymen qatar 32 ortalyq aýdandyq aýrýhana, 12 kópbeıindi jáne 20 aýdandyq aýrýhana jańǵyrtylady. Qazirgi tańda 10 nysanda qurylys-montajdaý jumystary tolyq aıaqtalǵan, al qalǵandary 2026 jylǵa deıin salynady.
Aıta keteıik, jańartylǵan aýrýhanalardyń bazasynda ınsýlt jáne kardıologııa ortalyqtary, hırýrgııa, travmatologııa, ońaltý jáne qarqyndy terapııa bólimsheleri ashylady. Temirtaý, Balqash, Jańaarqa, Úrjar, Shý, Merke, Talas jáne Beıneýde segiz aýrýhana qaıta qurylǵan.
«Ulttyq joba medısınalyq kadrlardy daıarlaýǵa da basymdyq beredi. Jaqyn jyldary aýyldarǵa 1100-den astam maman joldanbaq. Qazirdiń ózinde 1009 medısına qyzmetkeri (onyń ishinde 459 dáriger jáne 550 orta býyn maman) aýyldyq nysandarǵa jumysqa ornalasty. «Dıplommen aýylǵa!» baǵdarlamasy aıasynda mamandarǵa áleýmettik qoldaý kórsetilip, mártebesin arttyrý úshin qosymsha tólemder engizildi», delingen habarlamada.
2024 jyldan bastap tapshylyǵy joǵary salalar boıynsha aýylǵa barǵan dárigerlerge 100 ETJ kóleminde (8,5 mln teńge) birjolǵy qarjylaı tólem beriledi. Al 2026 jyldan bastap kadr jetispeýshiligi bar óńirlerde dárigerlerdi turǵyn úımen qamtamasyz etý tetigi iske qosylady. Bul jobany oblys ákimdikteri Úkimet tapsyrmasymen Otbasy banki arqyly júzege asyrady.
Tımýr Muratovtyń aıtýynsha, qabyldanǵan sharalar aýyl turǵyndarynyń medısınalyq kómekke qoljetimdiligin aıtarlyqtaı arttyryp, densaýlyq saqtaý salasynyń kadrlyq áleýetin kúsheıtedi.
