— Otbasy – urpaqtar sabaqtastyǵyn jalǵaıtyn, adamǵa minez-qulyq pen bolmys qalyptastyratyn ári ómirge mán beretin kúsh. Qoǵamnyń bolashaǵy da, eldiń kelisim men órkendeýge jeter joly da berik otbasylarǵa baılanysty. Halqymyz teginnen-tegin «Otan – otbasynan bastalady» demegen, — dedi mınıstr.
Ol balalarǵa qamqorlyq, úlkenderge qurmet, dástúr men rýhanı qundylyqtardyń sabaqtastyǵy halqymyzdy birtutas ári qýatty etetinin atap ótti.
Prezıdent Qasym-Jomart Toqaevtyń sózin keltire otyryp, Aıda Balaeva berik otbasy eldiń turaqty damýynyń kepili ekenin jáne memleket ana men balaǵa qamqorlyq jasaýǵa aıryqsha nazar aýdaratynyn aıtty.
Mınıstrdiń málimetinshe, qazaqstandyqtardyń basym bóligi (85–89%) úshin basty qundylyq — erli-zaıyptylar men balalar arasyndaǵy súıispenshilik, syılastyq pen túsinistik. Bul qundylyqtar berekeli otbasynyń negizin qalaıdy.
Sońǵy bes jylda ajyrasýlar sany shamamen 16 paıyzǵa azaıǵan. 2019 jyldan bastap Joǵarǵy Sotpen birlesip júzege asyrylyp kele jatqan «Baqytty otbasy» jobasy kóptegen daýlardy sheshýge yqpal etti. 2024 jyly isterdiń 37,5 paıyzy tatýlasýmen aıaqtaldy.
Sonymen qatar, neke qurǵaly jatqan juptarǵa arnalǵan oqytý baǵdarlamalary, ata-ana jaýapkershiligin arttyrýǵa baǵyttalǵan «Ata-analar akademııasy» jobasy iske asyrylyp keledi.
Búginde elimizde 131 otbasy qoldaý ortalyǵy jumys istep tur. Jyl basynan beri 40 myńnan astam azamat ortalyqtarǵa júginip, 15 myńnan astam keńes berildi, 4 myńǵa jýyq adam keshendi qoldaýǵa alyndy.
— Ár shańyraqta beıbitshilik, súıispenshilik pen kelisim ornasyn. Sizderdiń otbasylaryńyzǵa baqyt, densaýlyq pen bereke tileımin. Al ósip kele jatqan urpaq qamqorlyq pen ózara qurmetke toly ortada boı túzesin, — dep quttyqtaýyn qorytyndylady Aıda Balaeva.
