Foto: Aqorda
«Qazir jer júzinde syn-qaterler kóbeıip, halyqaralyq ahýal ýshyǵyp tur. Sonyń saldarynan túrli qaqtyǵystar kóbeıýde. Almaǵaıyp kezeń eshkimge ońaı bolyp jatqan joq. О́kinishke qaraı, soǵystyń sıpaty men bolmysy beleń alýda. Degenmen biz ótken zamannan durys sabaq alyp, syndarly ári ashyq kelissózderge umtylýymyz kerek. Mámilege balama joq. Bul turǵydan alǵanda, búgingi Sezdiń mán-mańyzy aıryqsha. Din basshylaryn gýmanıstik kózqarastardy tý etken Beıbitshilik elshileri dep aıtýǵa bolady. Sizder ortaq múdde úshin birigip, álem jurtshylyǵyn ıgi maqsat jolynda jumyldyrýǵa nıet bildirip otyrsyzdar. Barshańyzǵa shynaıy rızashylyǵymdy bildiremin», dedi Qasym-Jomart Toqaev.
Memleket basshysynyń aıtýynsha, Sezd alǵash qyzmetin bastaǵan sátten beri qazirgi zaman syn-qaterlerin ashyq talqylaıtyn biregeı alańǵa aınaldy. Kongreske qatysýshylardyń usynymdaryna sáıkes, Sezdiń 2033 jylǵa deıingi damý tujyrymdamasy ázirlenip, ol júzege asyrylyp jatyr.
«Atalǵan qujat bizdiń beıbitshilikti saqtaý, tatý-tátti ómir súrý jáne barshaǵa ortaq adamgershilik qundylyqtaryn berik ornyqtyrý sekildi ortaq maqsatymyzdy aıqyndaıdy. Geosaıası shıelenis ýshyqqan zamanda munyń bári aıryqsha mańyzdy. Sezdiń qorytyndy deklarasııasy resmı qujat retinde BUU Bas Assambleıalarynda taralady. Bul sezd jumysyna berilgen joǵary baǵa. Aldaǵy mereıtoılyq 80-shi sessııada da atalǵan úrdis jalǵasady dep úmittenemin», dedi Qasym-Jomart Toqaev.
