Koreıa jáne Orta Azııa elderiniń, sondaı-aq elimizdiń ózge óńirleriniń delegasııasy qatysqan halyqaralyq forýmda Túrkistan oblysynyń ınvestısııalyq múmkindikteri tanystyryldy. «Qazaqstan men Koreıa arasyndaǵy yntymaqtastyqtyń mańyzdy nátıjeleriniń biri – Túrkistan oblysynda qýattylyǵy 926 MVt bolatyn bý-gaz elektr stansııasy qurylysynyń bastalýy boldy. Atalǵan joba «Samruk-Kazyna» qory men Ońtústik Koreıanyń «Doosan Enerbility» kompanııasymen birlesip júzege asyrylýda. Bul Qazaqstannyń energetıka salasyndaǵy iri ınvestısııalardyń biri. О́ziniń strategııalyq geografııalyq ornalasýynyń arqasynda Túrkistan oblysy Ortalyq Azııadaǵy mańyzdy kólik-logıstıkalyq hab rólin atqarady. Biz osy áleýetti ınvestısııa tartý, eksporttyq múmkindikterdi arttyrý jáne sheteldik seriktestermen, sonyń ishinde Koreıamen ekonomıkalyq baılanysty nyǵaıtý úshin tıimdi paıdalanýǵa daıynbyz», – dedi oblys ákimi Nuralhan Kósherov. Sondaı-aq oblys ákimi jańa jobalardy júzege asyrýǵa jan-jaqty qoldaý kórsetiletinin aıtyp, uzaqmerzimdi yntymaqtastyqqa senim bildirdi.
Sonymen qatar forýmda Koreıa Respýblıkasynyń Qazaqstandaǵy elshisi Chjo Te Ik, «GAROK» qaýymdastyǵynyń bas hatshysy Iý Mın Bon, Qyrǵyzstan Respýblıkasy Mınıstrler kabıneti janyndaǵy Memlekettik qyzmet jáne jergilikti ózin-ózi basqarý isteri jónindegi memlekettik agenttiktiń jergilikti ózin-ózi basqarýdy damytý basqarmasynyń basshysy Djeenbaev Baktyıarbek, «Woosong University Kazakhstan» ýnıversıtetiniń dırektory Chon Iong Hva sóz alyp, seriktestik ornatýǵa daıyn ekenderin jetkizdi.
Túrkistan oblysy – Qazaqstandaǵy jetekshi agrarlyq óńirlerdiń biri. Jyl saıyn jylyjaılar men egistik alqaptarynyń kólemi artýda. Salaǵa Koreıanyń jasandy ıntellekt, robototehnıka jáne bıotehnologııaǵa negizdelgen ozyq agrotehnologııalaryn, sonyń ishinde zamanaýı «aqyldy» jylyjaılar salý tájirıbesin engizý josparlanyp otyr. Sonymen qatar Túrkistan qalasynda IT salasynyń mamandaryn daıyndaıtyn Woosong ýnıversıtetiniń fılıalyn ashý – óńirdiń sıfrlyq transformasııasyna baǵyttalǵan mańyzdy qadam. Bul joba Qazaqstan men Koreıa arasyndaǵy ǵylymı-bilim berý yntymaqtastyǵyn nyǵaıta túspek.
Aıta keteıik, ótken jyly eki el arasyndaǵy ekijaqty taýar aınalymy 3,1 mlrd AQSh dollaryna jetti. Búgingi tańda Qazaqstanda Hyundai, KIA, Samsung, LG, Doosan jáne basqa da 876 ońtústikkoreıalyq kompanııa tabysty jumys istep keledi.
TÚRKISTAN
