Qarqaraly óńiriniń «avtodıagnostıkasy» atanyp ketken Bóribaı aqsaqal osy bir eńbegine aqy almaıdy. «Aqynyń eń qymbaty – adamnyń alǵysy», deıdi aty ańyzǵa aınalǵan avtomehanık. Boıynan bulqynyp shyqqan bul qabileti bala kezinde baıqalsa kerek. О́zdiginen aýyldaǵy balalardyń velosıpedin buzyp, ony qaıta qurap, qolyn jattyqtyrady. Sodan soń úıindegi radıoqabyldaǵysh qurylǵysynyń mehanızmin ashyp-shashyp, ony da ońaı meńgerip alǵan jas bala aýylynyń qajetine jaraıdy. Alǵash shyqqan lampaly teledıdardyń da qurylymyn tez meńgerip alady. Janyp ketken olarǵa qaıta jan bitirip júrgen kezinde ol on jastan endi asqan kórinedi.
Sodan beri avtomehanık mamandyǵyna mashyqtanady. Aýyldyń elektrıgi de ózi. Aqbaı-Qyzylbaı aýylyndaǵy aǵaıyn isten shyqqan tońazytqysh, muzdatqysh, sıfrly teledıdarlaryn qalaǵa tasyp áýre bolmaıdy. Bóribaı aqsaqal sıqyrly saýsaǵymen-aq jan bitiredi. Tipti tańǵajaıyby, keıingi shyqqan plazmaly teledıdardyń da tilin uǵynyp alady. Keıingi kez kelgen zamanaýı tehnıkańyzdy jóndeý Bóribaı sheberge sóz emes. Sodan da bolar, qudaı darytqan bul qapysyz qarym-qabiletin aqsaqal saýdalaǵan joq.
Avtomehanık aqsaqaldyń kóliktiń qaı bólshegi isten shyqqanyn dybysyn tyńdap-aq tabatyn qabileti de erekshe damyǵan. Ásirese aýyl sharýashylyǵy tehnıkalarynyń aqaýyn tez anyqtap beredi. Bólshekti aǵytyp alyp, qaıta jóndep, ony ornyna ornyqtyrǵansha Bóribaı aqsaqal baıyz tappaıdy. Osy jazdyń ózinde úsh traktordyń motoryn qaıta jınap shyǵypty. Eki-úsh «Nıva» kóliginiń aldyńǵy tiregin jańalaǵan. Jáne únemi ózine qolǵabys jasap júretin inisiniń kóligindegi mehanıkalyq berilis qorabyn jóndep beripti.
Odan bólek, kóliktiń de kez kelgen tuıyqtalyp qalǵan toǵyn qalpyna keltiredi. Avtokóliktiń redýktory, datchıgi, relesi degen bólshekterdi de jazbaı tanıdy. Eń alǵash bir malǵa alynǵan «Moskvıch-2140» kóligin jóndepti. «Bir ózim esigin jańalap salyp, toqtaryn retke keltirgen kezimde jalyndaǵan jas jigit edim», deıdi.
«Temirde de til bar. Ony sezine bilý kerek. Qudaı osyndaı qabilet bergen eken, dán rızamyn. Eń kúshti ermegim – osy sharýam. Eki kózimniń qyzmetin eki qolym artyǵymen atqaryp otyr. Soǵan táýbe etemin. Eger osyndaı ónerim bolmasa, bul ómirdi qalaı ótkeretinimdi de elestete almaımyn. Osy bir jumystan boıyma kúsh alamyn. Seksenniń seńgirine de jaqyndap qaldyq. Ońaı jas emes. Qudaı bergen qabiletim aýylymnyń ıgiline jarap tur. Sony kóńilime medet qylamyn», deıdi maıtalman mehanızator.
Aıtpaqshy, Bóribaı aqsaqaldyń adal jary Raıa ájeısiz sharýasy tynbaıdy. Kóp-kórim kómekshisi. Raıa ájeı de kilt-saımannyń túr-túsine deıin biledi. Avtomehanıktiń oń qolyna aınalǵan ájeı de tehnıkanyń tilin birshama túsinip qalǵan.
Aýyldyń dúrildep turǵan tusynda Bóribaı aqsaqalsyz toı da, merekelik konsert te ótpeıtin bolypty. О́ıtkeni dombyrasyn shertip, baıanyn tartyp án salǵanda sahna shirkin jaınap ketetin edi deıdi el-jurt. Bala kezinen án-jyrǵa áýestengen keıipkerimiz dombyranyń qońyr únin janyna jalaý qylady. Án ónerinen ómirine osylaısha ár alady.
Aýylynan alystaǵysy kelmeıdi. Alaıda qajyrly kezinde qalaǵa da kóshkisi keledi. О́kinishke qaraı, osydan on shaqty jyl buryn aýyldaǵy qarashańyraǵynyń tóbesi tozyp, opyrylyp ortasyna túsipti. Sodan bos qalǵan aýyldasynyń úıinde turyp jatyr. Qaraǵandyǵa bolmasa da, Qarqaralyǵa kóshsek deıdi. Taǵdyryna eshqandaı shaǵymy joq birinshi top múgedegi shaǵyn bolsa da páter armandap otyr. Raıa ájeı ekeýiniń endigi elge artar úmiti, amanaty osyndaı. Bizdiń de aqjúrek avtomehanıktiń, ǵalamat daryn ıesiniń óz baspanasyna qol jetkizetin kúnniń alys emestigin ishimiz sezedi.
Qaraǵandy oblysy,
Qarqaraly aýdany,
Aqbaı-Qyzylbaı aýyly
