Qazirgi kezde «Elektr jabdyqtary» mamandyǵy boıynsha elektromehanıka zaýytynda jumys istep jatqan Almaty telekommýnıkasııa jáne mashına jasaý kolledjiniń túlekteri teorııalyq bilimmen qatar áleýmettik seriktestermen birlesken tájirıbelik daǵdylarǵa mashyqtanýda. Byltyrǵy oqý jylynda kolledjdiń alty túlegi jınaqtalǵan transformatorlyq qosalqy stansalardyń slesar-jınaqtaýshysy bolyp zaýytqa jumysqa qabyldanyp, laıyqty jalaqymen, áleýmettik qoldaýmen qamtamasyz etilgen bolatyn. Bıylǵy oqý jylynda 25 stýdent dýaldi oqytý formaty boıynsha óndiristik tájirıbeden ótip jatyr.
– «Jumysshy mamandyqtar jyly» jarııalanǵan soń, qala kolledjderimen tyǵyz ári belsendi jumys isteı bastadyq. Solardyń biri – Almaty telekommýnıkasııa jáne mashına jasaý kolledji. Qazir zaýytta kolledjdiń 50-den astam stýdenti jumys isteıdi. Olardyń altaýy resmı túrde jumysqa qabyldanyp, aıyna 500 myń teńgeden astam jalaqy alyp otyr. Stýdentter zaýytqa birinshi kýrstan bastap óndiristik tájirıbege qabyldaný tájirıbesi keń taraǵan. Dýaldi oqytý barysynda stýdentterdiń 9 aı tájirıbeden ótýi qarastyrylyp otyr. Kolledjben áriptestik aıasynda jyl saıyn 30-40 stýdent qabyldap otyrý dástúrli sharaǵa aınalyp, olardyń kópshiligi turaqtap, jumysqa ornalasyp jatady, – deıdi «Almaty elektromehanıka zaýytynyń» basqarma tóraǵasy Ashat Ergeshev.
Al Almaty avtomehanıka kolledji «Kólikke tehnıkalyq qyzmet kórsetý, jóndeý men paıdalaný» baǵyty boıynsha mamandar daıarlaýda jetekshi oryndy ıelenip otyr. Bul elimizde jumysqa ornalasý múmkindigi joǵary, eń suranysqa ıe baǵyttyń biri sanalady. Kolledj túlekteri iri avtoservıster men kólik kásiporyndarynda sátti jumys istep júr. Olardyń kópshiligi avtokólikke qatysty is-sharalar men kórmelerge qatysyp, bilikti mehanıkter, avtoelektrıkter, avtojóndeý sheberi retinde tanylǵan. Keıbiri óziniń jeke servıs stansasyn ashyp alǵan.
– «Almaty avtomehanıka kolledjimen 20 jyldan beri tyǵyz jumys istep kelemiz. Birinshi kýrs stýdentteriniń ózi jaqsy nátıje kórsetip jatady. nde-Kolledjdi bitirgennen keıin jumysqa qalyp jatqan túlekter de kóp. Qazir zaýytta jumys istep jatqan túlekter biliktiligimen kózge túsip júr, – deıdi «SVS-TRANS» JShS servıs ortalyǵynyń dırektory Taıyr Nurlanov.
Kolledjde modýldik-quzyrettilikke negizdelgen oqytý ádisi engizile bastady. Stýdentter oqý barysynda-aq tájirıbe jınaqtap, eńbek naryǵynda básekege qabilettiligin dáleldep jatyr. «Men bul kompanııada bir jyldan beri geometrıst bolyp isteımin. Eki jyl osy kásiporynda kásibı tájirıbeden óttim. Alǵashynda jaı avtomehanık bolyp istep, keıin meni geometrıst bolyp qabyldandym. Bul meniń kolledje alǵan bilimimniń nátıjesi» deıdi Naıl Babaev.
Qaladaǵy kolledjder jetistiginiń biri – stýdentterdiń biliktiligin kórsetip, daıarlyq sapasyn dáleldeýge múmkindik beretin WorldSkills jarysyna qatysýy. О́ńirlik chempıonattarda Almaty avtomehanıka kolledj stýdentteri «kýzov jóndeý», «avtokólikti tehnıkalyq qyzmet kórsetý jáne jóndeý» quzyrettiligi boıynsha júldeli oryndarǵa ıe bolyp júr. Bıyl qazan aıynda kolledjde «Avtokólik quraldaryn tehnıkalyq qyzmet kórsetý, jóndeý jáne paıdalaný» mamandyǵy boıynsha quzyretter ortalyǵy ashylmaq. Qala ákimdigi men bilim basqarmasynyń tehnıkalyq jáne kásiptik bilim berý júıesin jańǵyrtý aıasynda qurylǵan Quzyretter ortalyǵy avtoservıs salasynda joǵary bilikti mamandar daıarlaýǵa arnalǵan úlgili alańǵa aınalyp, WorldSkills halyqaralyq standarttaryna saı keletin zamandyq bilim berý baǵdarlamalaryn júzege asyrýǵa múmkindik beredi. Kolledj oqytýshylary Estonııa, Latvııa, Fınlıandııa, Ońtústik Koreıa men Qytaıda taǵylymdamadan ótti.
Eńbek naryǵynda Týrızm jáne qonaqjaılylyq ındýstrııasy kolledji túlekterine de suranys artqan. Kolledj basshylyǵy bıznespen yntymaqtasyp, tájirıbemen ushtasqan oqý ádisin sátimen júzege asyryp keledi. Kolledj kóp jyl boıy qonaq úı men meıramhana bıznesine kadr daıarlap kele jatqan tehnıkalyq jáne kásiptik bilim beretin elimizdegi jetekshi mekeme sanalady. Salalyq kásiporyndarmen tyǵyz baılanys ornata otyryp, kolledj oqý sapasyn joǵary deńgeıde ustap turýmen qatar, stýdentterine qyzmette ósip-ónetin múmkindik usyna alady.
Búginde kolledj qaladaǵy 280 kásiporynmen – qonaq úıler, meıramhanalar, týrıstik kompanııalarmen yntymaqtastyq týraly kelisimshartqa otyrǵan. Kolledj dırektory Nurdáýlet Jabyqbaevtyń aıtýynsha, jumys berýshilermen, áleýmettik seriktestermen tyǵyz baılanys ornaǵan. Bul stýdentterdiń jumysqa jyldam ornalasýyna múmkindik beredi. Bıyl kolledjdi 460 stýdent bitirse, olardyń 80 paıyzdan astamy óz mamandyǵy boıynsha jumysqa ornalasty.
Kolledjde túlekterdiń ósýi men jumysqa ornalasýyn qamtamasyz etetin arnaıy ortalyq jumys isteıdi. Bul ortalyq túlekterdiń óndiriste jumysqa ornalasý kórsetkishin barynsha arttyrýǵa tyrysady. «Munda túrli sheberlik sabaqtary, qonaq dáristeri ótkiziledi. Biz jumys berýshilerdi shaqyryp, túlekterge jumysqa ornalasý joldaryn túsindiremiz, jármeńkeler uıymdastyramyz» deıdi oqý-óndiristik jumys jónindegi orynbasar Gúlim О́mirbekova. Kolledj basshylyǵy joǵary nátıjege áleýmettik seriktestik pen kásibı mamandar daıarlaýǵa baǵyttalǵan turaqty jumystyń arqasynda qol jetkizgenin aıtady.
