2,8 mlrd. teńgeniń múligi zańdastyryldy

Elimizde byltyrǵy qyr­kúıekte bastaý alǵan múlikti zańdastyrý sharasyna atyraý­lyqtardyń da qatysy arta túsýde. Zańdastyrý sharasyna baılanysty qurylǵan komıssııalar músheleriniń málim etýinshe, Atyraýda qazirge deıin 2,8 mlrd. teńgeniń 373 múligi zańdastyrylypty. Jalpy alǵanda, atyraýlyqtardan 4,2 mlrd. teńgeniń 505 múlkin zańdastyrýǵa 397 ótinish berilgen. Munyń ishinde 377,7 mln. teń­gege baǵalanǵan 23 múlikti qujat­tardyń jetispeýshiliginen zańdas­tyrýdan bas tartylǵan. Sony­men birge, qazir komıssııa múshelerimen 109 múlikke qatysty 72 ótinish qarastyrylyp jatyr. Bul ótinishterdegi kórsetilgen múlikterdiń jalpy quny 1,1 mlrd. teńgeni quraıdy. Múlikterdi zańdastyrýǵa baılanysty ótinishterdiń basym bóligi, ıaǵnı 303-i Atyraý qalasy turǵyndarynyń úlesine tıedi. Qala turǵyndary 152 turǵyn-jaı men kommersııalyq baǵyttaǵy ártúrli 126 nysandy zańdastyrýdy kózdepti. Al Qurmanǵazy aýdanynan – 33, Qyzylqoǵadan – 21, Isa­taıdan – 20, Jylyoıdan – 15, Mahambetten – 3 jáne Ma­qat aýdanynan 2 ótinish túsipti. Bir qyzyǵy, Inder aýda­nynyń turǵyndarynan múlikti zańdastyrýǵa birde-bir ótinish berilmepti. Sondaı-aq, atyraýlyqtar tarapynan shetelderdegi múlikti, ne qarjyny zańdastyrý týraly ótinish te túspepti. Joldasbek ShО́PEǴUL, «Egemen Qazaqstan». Atyraý oblysy.