Smıtson ınstıtýtymen yntymaqtastyq
Prezıdenttiń aıtýynsha, qazaqstandyq antropologtar, tarıhshylar, mádenıettanýshylar men ónertanýshylarǵa álemdegi eń kóne ári bedeldi ǵylymı-zertteý ortalyqtarynyń biri sanalatyn Smıtson ınstıtýtynda bilim alý múmkindigi beriledi. Bul qadam «Bolashaq» baǵdarlamasy aıasynda júzege asady.
Smıtson ınstıtýty – álemdegi eń iri mádenı, bilim berý jáne ǵylymı-zertteý kesheni. Onyń quramyna 21 murajaı men galereıa, 14 ǵylymı jáne bilim berý ortalyǵy, sondaı-aq kitaphanalar men ulttyq haıýanattar baǵy kiredi. Mundaǵy baı ǵylymı orta qazaqstandyq jas ǵalymdarǵa tyń izdenisterge jol ashyp, álemdik deńgeıdegi jańa tájirıbelerdi ıgerýge múmkindik beredi. Prezıdent atap ótkendeı, mundaı yntymaqtastyq Qazaqstannyń ǵylymı qaýymdastyǵyn jańa deńgeıge kóterip, ulttyq ǵylymnyń damýyna serpin bermek.
ETS kompanııasymen jańa bastamalar
Prezıdent Toqaevtyń taǵy bir mańyzdy kezdesýi – bilimdi baǵalaý men testileý salasyndaǵy álemdik kóshbasshy sanalatyn Educational Testing Service (ETS) kompanııasynyń basshylyǵymen ótti. Bul uıym – testologııa ǵylymynyń bastaýynda turǵan eń kóne ári bedeldi qurylymdardyń biri.
Kelissózder nátıjesinde ETS-tiń jetekshi mamandary qatysatyn arnaıy birlesken jumys toby qurylady. Ol top Qazaqstandaǵy Ulttyq biryńǵaı testileýdi (UBT) halyqaralyq deńgeıdegi sarapshylardyń tájirıbesine súıene otyryp túbegeıli jańǵyrtýmen aınalysady. Nátıjesinde, UBT-nyń mazmuny men ádistemesi zamanaýı talaptarǵa saı qaıta qaralyp, baǵalaýdyń sapasy joǵary halyqaralyq standarttarǵa sáıkestendirilmek.
ETS búginde jyl saıyn álemniń 180 elinde 50 mıllıonnan astam test ázirlep, ótkizedi. Onyń tájirıbesi Qazaqstan úshin mańyzdy, sebebi qazirgi bilim berý reformalarynyń tabysy ádil baǵalaý júıesine tikeleı baılanysty. Memleket basshysy bul baǵyttaǵy seriktestikti «Qazaqstan bilim júıesiniń básekege qabilettiligin arttyrýdyń kepili» dep atady.
Prezıdenttiń AQSh-taǵy sapary aıasynda ótken bul kelissózder Qazaqstan ǵylymy men bilim berý salasynda jańa múmkindikterdiń esigin ashyp otyr. Smıtson ınstıtýtymen áriptestik – otandyq ǵalymdardyń álemdik ǵylymı keńistikke shyǵýyna jol ashsa, ETS kompanııasymen yntymaqtastyq – ulttyq testileý júıesin halyqaralyq standarttarǵa beıimdeýge múmkindik beredi. Bul qadamdar Qazaqstannyń jańa býyn ǵalymdary men bilim alýshylaryna sapaly bilim alýǵa, ozyq tájirıbelerdi meńgerýge jáne eldiń ıntellektýaldy áleýetin kúsheıtýge yqpal etpek.
