Eýrazııalyq úkimetaralyq keńes otyrysy ótti

Belarýs Prezıdentimen kezdeskende  elder arasyndaǵy saýda men ekonomıkalyq baılanystar talqylandy. Sondaı-aq ónerkásip salasynda ynty­maqtastyqty kúsheıtý ári jańa ınnova­sııalyq jobalardy birge iske asyrý máselelerine erekshe kóńil bólindi.

Eýrazııalyq úkimetaralyq keńestiń otyrysyna Belarýs Premer-mınıstri Aleksandr Týrchın, Qyrǵyz Respýblıkasy Prezıdent Ákimshiliginiń basshysy ári Mınıstrler kabıneti tóraǵasy Adylbek Kasymalıev, Reseı Úkimetiniń tóraǵasy Mıhaıl Mıshýstın, Armenııanyń vıse-premeri Mger Grıgorıan beınekonferensııa arqyly qatysty. Sonymen qatar Eýrazııalyq ekonomıkalyq odaq (EAEO) janyndaǵy baqylaýshy elderden О́zbekstan Premer-mınıstri Abdýlla Arıpov, Irannyń ónerkásip, shahta jáne saýda mınıstri Seıed Mohammad Tabak, Kýbanyń ónerkásip mınıstri Eloı Alvares Martınes boldy. Shaqyrylǵan elderden Ázerbaıjan Premer-mınıstri Alı Asadov qatysty. Sondaı-aq Eýrazııalyq ekonomıkalyq komıssııa (EEK) alqasynyń tóraǵasy Baqytjan Saǵyntaev, TMD Bas hatshysy Sergeı Lebedev jáne basqa da ókilder jınaldy.

Shaǵyn quramdaǵy otyrysta bıylǵy 31 qańtarda ótken jıynda beril­gen tapsyrmalardyń oryndalý barysy qaraldy. Birneshe uıymdastyrýshylyq másele sheshildi.

Keńeıtilgen quramdaǵy otyrys­ta qatysýshylar EAEO-nyń ıntegra­sııa­­­lanǵan aqpa­rattyq júıesin, kólik ınfra­qurylymyn damytý men basqa da máseleler týraly pikir almasty.

Premer-mınıstr Oljas Bektenov óz sózinde ekonomıkalyq yntymaqtastyqty tereńdetýdiń mańyzyn atap ótti. Ol kooperasııa, kólik-tranzıt jáne sıfrlyq salada úlken múmkindik bar ekenin aıtty.  EAEO-nyń jahandyq ekonomıkadaǵy ornyn kúsheıtý úshin halyqaralyq árip­testikti damytý ári jańa naryqtarǵa shyǵýǵa qolaıly jaǵdaı jasaý qajet ekeni de aıtyldy.

Jıynda agroónerkásip kesheni erek­she taqyryp boldy. Ol – azyq-túlik­pen qamtamasyz etý men ornyqty damý­dyń negizi. Buǵan deıin ónerkásiptik jobalarǵa bólinip kelgen EAEO bıýdjetin aýyl sharýashylyǵyna tartý máselesi qaras­ty­ryl­dy. Bul qadam jańa tehnologııalardy engizýdi jedeldetip, jetkizý tizbegin ny­ǵaı­týǵa jáne EAEO elderiniń ónimderin syrt­­qy naryqta básekege qabi­letti etýge kómektedi.

Sondaı-aq tehnıkalyq reglamentterdi ázirleýde sıfrlandyrýdyń róli ataldy. Ol biryńǵaı qaýipsizdik talaptaryn jańartýdy, úderisti jedeldetýdi, ashyq­tyq­ty arttyrýǵa jol ashady. Bir­lesip iske asy­rylyp jatqan «Sıfrlyq tehnıkalyq ret­teý» jobasy ıntegrasııany jańa deń­geı­ge kóteredi.

«Prezıdent Qasym-Jomart Toqaev taıaýdaǵy Joldaýynda aldaǵy úsh jyl ishinde elimizdi shynaıy sıfrlyq elge aınaldyrý týraly strategııalyq mindet qoıdy. Qazaqstan Úkimeti qazir sıfrlandyrý, jasandy ıntellekt tehnologııalaryn engizý boıynsha qarqyndy jumystar júrgizip jatyr. Biz jaqyn arada «Alem.ai» halyqaralyq jasandy ıntellekt ortalyǵyn ashamyz, ol sıfrlyq ekonomıkany, shyǵarmashylyq ındýstrııa­ny ilgeriletýde ári jasandy ıntellekt ekojúıesin qurý draıverine aınalmaq. Otandyq IT sheshimderdiń eksportyn ulǵaıtý boıynsha da jumys istep jatyrmyz. Barlyq áriptesimdi JI salasyndaǵy jobalardy qarqyndy júzege asyrýǵa shaqyramyn. Bul biz ázirlep jatqan Jol kartasynda eleýli oryn alýǵa tıis», dep atap ótti Oljas Bektenov.

Eýrazııalyq úkimetaralyq keńes otyrysynyń qorytyndysynda birneshe mańyzdy qujatqa qol qoıyldy. Qabyl­danǵan sheshimder ónerkásip pen agro­ónerkásiptik kooperasııany damytýǵa, sıfrlyq saladaǵy yntymaqtastyqty kúsheıtýge, ótkizý naryqtaryn keńeıtýge jáne múshe elderdiń ekonomıkalyq turaqtylyǵyn arttyrýǵa baǵyttaldy. Kelesi Eýrazııalyq úkimetaralyq keńes otyrysy bıylǵy jeltoqsan aıynda Máskeýde ótedi.