Foto: Sý resýrstary jáne ırrıgasııa mınıstrligi
Qabyldanǵan sharalardyń nátıjesinde sý únemdeý tehnologııalaryn qoldaný aýmaǵy 86%-ǵa ulǵaıyp otyr. Naqtyraq aıtqanda, 2023 jylǵy 312,2 myń gektardan bıyl shamamen 581 myń gektarǵa jetken.
Memlekettik qoldaý sý únemdeý tehnologııalaryn shyǵarý naryǵynyń damýyna da yqpal etti. 2024 jyly Túrkistan oblysynda jáne Almaty, Astana qalalarynda jańbyrlatyp jáne tamshylatyp sýarý jabdyqtaryn jasap shyǵaratyn tórt otandyq zaýyt ashylǵan.
Bıyl Jambyl oblysynda tamshylatyp sýarý júıelerin shyǵaratyn qazaq-qytaı birlesken jobasy iske qosyldy. Kásiporynnyń óndiristik qýaty 14 myń gektar alqapty tamshylatyp sýarý lentalarymen qamtýǵa múmkindik berdi.
Sondaı-aq Sý resýrstary jáne ırrıgasııa mınıstrliginiń málimetinshe Túrkistan qalasynyń ındýstrııalyq aımaǵynda tamshylatyp sýarý júıesine arnalǵan plastık qubyr óndirisi iske qosyldy. Jetisaı aýdanynyń ındýstrııalyq aımaǵynda polıetılendi qaıta óńdeý jáne sý únemdeý jabdyqtaryn óndirýdi iske qosý jumystary júrip jatyr. Al Maqtaaral aýdanynyń ındýstrııalyq aımaǵynda jyl sońyna deıin plastık qubyrlar, lentalar jáne tamshylatyp sýarý qurylǵylaryn shyǵaratyn óndiris iske qosylmaq.
Qyzylorda oblysynda túrik ınvestorlary jobalyq qýaty 20 myń gektar bolatyn tamshylatyp sýarý júıelerin jasaıtyn zaýytty iske qosýdy josparlap otyr.
«Memleket basshysynyń tapsyrmasyna sáıkes, biz elimizdiń sý salasyna ınvestısııa tartý jumysyn belsendi júrgizip jatyrmyz. Halyqaralyq áriptestermen yntymaqtastyq zamanaýı tehnologııalar men ınvestısııalarǵa jol ashady, biraq barlyq strategııalyq sheshim tek Qazaqstanda qabyldanady. Sý resýrstary buryn da, qazir de tikeleı memleket baqylaýynda jáne solaı qala beredi de. Ásirese mańyzdy sý nysandaryn shet memleketterdiń qoldanysyna berý máselesi eshqashan qaralǵan emes. Bizdiń basty maqsatymyz – azamattarymyzdyń múddelerin qorǵaý úshin sý sharýashylyǵyn jańartyp, jetildirý jáne ulttyq qaýipsizdikti qamtamasyz etý. Sý – óte mańyzdy strategııalyq resýrs. Biz ár tamshysyn tıimdi paıdalanyp, únemdeý baǵytynda jumys istep jatyrmyz. Bul – elimizdiń bolashaǵy úshin asa mańyzdy», dedi sala mınıstri Nurjan Nurjigitov.
