Ardagerler ortalyǵynyń jalpy aýmaǵy 5 myń sharshy metrden asady. Munda zeınetkerlerdiń bos ýaqytyn tıimdi ótkizýine barlyq jaǵdaı jasalǵan. Ǵımarattyń aýlasy abattandyrylyp, arnaıy demalys alańshalary salyndy. Baý-baqsha janynan terrenkýr ornatylyp, skandınavııalyq serýendeý joly qarastyrylǵan. Jańa ortalyq bir aýysymda 200 adamdy qabyldaı alady.
Qazynaly qarııalardyń ıgiligine berilgen ǵımarattyń ashylý saltanatyna oblys ákimi Nuralhan Kósherov qatysyp, kópshilikti aıtýly merekemen quttyqtady. Qarttar kúnine oraı merekelik dastarqan jaıylyp, ardagerler men zeınetkerlerge konserttik baǵdarlama usynyldy. Marapattar tapsyryldy.
Aıta keteıik, oblysta 200 myńnan asa zeınetker bar, 100 jastan asqan 51 qarııa turady. Qarııalardyń ómir súrý sapasyn jaqsartý úshin óńirde 21 «Belsendi uzaq ómir súrý» ortalyǵy jumys isteıdi. Ol mekemelerde 10 myńnan astam zeınetker tynyǵyp, ýaqyttaryn tıimdi ótkizip júr. Jyl saıyn 8 myńǵa jýyq qarııa oblystyq bıýdjet esebinen demalys oryndarynda demalyp, densaýlyǵyn túzeıdi.
