Kórshi elde bolyp jatqan jańalyqqa biz beker toqtalyp otyrǵan joqpyz. Aıtjan – О́zbekstanda týyp-ósken óz qandasymyz. Bala kezinen balýandyq ónerge den qoıǵan ol birden dara talantymen oqshaýlandy. Áýeli Qalmahanov 2022 jyly Rımde jasóspirimder jáne bıyl Sofııada jalaýy jelbiregen jastar arasyndaǵy álem birinshilikterinde qarsylas shydatpaı, jeńis tuǵyrynyń eń bıik satysyna kóterildi. Ústimizdegi jyldyń mamyr aıynda Ammanda eresekter arasynda Azııa chempıony atandy.
Zagrebtegi dúnıejúzilik dodada 63 kg salmaq dárejesinde kúsh synasqan Aıtjannyń asqan sheberligine tánti boldyq. 19 jastaǵy qandasymyz tusaýkeser kezdesýinde Eýropa chempıonatynyń eki dúrkin júldegeri, ýkraınalyq Aleksandr Grýshınde oısyrata utsa, shırek fınalda Qazaqstan qurama komandasynyń beldi múshesi, álem chempıonatynyń fınalısi, Azııa chempıony Erjan Jarylqasynovty merzimnen buryn jeńdi. Jartylaı fınalda jastar arasyndaǵy álem birinshiliginiń jeńimpazy, eresekterdiń Eýropa chempıonatynyń qola júldegeri, moldovalyq Vıtalıı Eremenkony ońaı eńsergen Qalmahanov bas júlde úshin tartysta Ońtústik Koreıanyń oǵylany, Azııa oıyndarynyń qola medalisi Handje Chýndy da ońdyrmady. Osylaısha, ózinen áldeqaıda eresek ári tájirıbeleri ábden tolysqan saqa sportshylarǵa san soqtyrǵan qazaq balýany tórtkúl dúnıeniń teńdessizi dep tanyldy.
Eger ótkenge zer salsaq, kúrestiń bul túrinen О́zbekstan balýandarynyń altyn almaǵanyna tabany kúrekteı 24 jyl bolǵan eken. Osylaısha, qazaqtyń qaısar uly Aıtjan Qalmahanovtyń arqasynda «Ala shapandy» aǵaıyndarymyz shırek ǵasyr boıy ańsaǵan armandaryna qol jetkizdi. Jaraısyń, jaısanym!
