Bul týraly Astanada ótip jatqan Digital Bridge 2025 forýmynyń kýlýarynda Jasandy ıntellekt jáne sıfrlyq damý vıse-mınıstriniń mindetin atqarýshy Rostıslav Konıashkın málimdedi.
Vıse-mınıstrdiń aıtýynsha, eGov Mobile mobıldi qosymshasynda jasandy ıntellekt negizindegi chat-keńesshi jumys istep tur. Ol azamattarǵa qajetti qyzmet túrin anyqtaýǵa jáne ony alý tártibin túsindirýge kómektesedi.
О́kinishke qaraı, keıde azamattar dál osy sátte qandaı qyzmetti alý keregin naqty bilmeı jatady. Sondyqtan bul keńesshi eń aldymen izdeý fýnksııasyn atqaryp, memlekettik qyzmetti qalaı rásimdeýge bolatynyn túsindiredi, – dedi Konıashkın.
Sonymen qatar ol sıfrlandyrýdyń taǵy bir baǵyty – memlekettik organdardyń ishki prosesterin ońtaılandyrý dep atady. Birqatar qyzmetterde artyq qadamdar, sonyń ishinde komıssııa otyrystary men qosymsha qujat talap etý tájirıbesi alynyp tastalmaq.
Budan bólek, 1414 baılanys ortalyǵynda pılottyq joba iske qosyldy: ár elýinshi qońyraýdy jasandy ıntellekt óńdeıdi. JI-assıstent azamattardyń suraqtaryna jaýap berip, keńes beredi, sondaı-aq keıbir memlekettik qyzmet túrlerin de kórsete alady. Aldaǵy ýaqytta bul tehnologııany keńinen engizý arqyly memleket pen halyq arasyndaǵy ózara árekettestiktiń sapasy men qolaılylyǵyn arttyrý josparlanyp otyr.
