4-qazannan 5-qazanǵa qaraǵan túni AQSh-tyń Nevada shtaty, Las-Vegas qalasynda UFC uıymynyń kezekti týrnıri – UFC 320 ótedi. Týrnır aıasynda barlyǵy 14 jekpe-jek josparlanǵan. Onyń beseýi – basty kard.
Kezdesýler Qazaqstan ýaqytymen 03:00-de bastalady. Negizgi jekpe-jekter 05:00-de, al basty kard 07:00-de ótedi.
Atalǵan týrnırde qazaqstandyq jartylaı orta salmaqtaǵy sportshy Nıkolaı Veretennıkov (13-6) UFC-degi tórtinshi jekpe-jegin ótkizedi. Onyń qarsylasy – 32 jastaǵy amerıkalyq sportshy Pýnahele Sorıano (11-4).
Veretennıkov UFC-de 1 jeńis jáne 2 jeńilis nátıjesin tirkegen. Sońǵy kezdesýinde ol jeńiske jetti. Sorıanonyń kórsetkishi – 5 jeńis, 4 jeńilis, qazirgi ýaqytta ol eki kezdesýde qatarynan jeńiske jetip otyr. Bul jekpe-jek Veretennıkov úshin uıymdaǵy kelisimshart boıynsha sońǵy aıqas bolmaq.
Sportshylar oktagonǵa úshinshi bolyp shyǵady. Jekpe-jek Qazaqstan ýaqytymen shamamen 03:40-ten keıin bastalady.
Basty jekpe-jekte jartylaı aýyr salmaqtaǵy reseılik chempıon Magomed Ankalaev (20-1-1-1) pen burynǵy belbeý ıegeri, brazılııalyq Aleks Pereıra (12-3) arasyndaǵy qarymta kezdesý ótedi.
