Demek kez kelgen kredıtor, meıli ol bank bolsyn, seriktestik ne qaryzdy satyp alǵan uıym bolsyn, bereshekti óndirip ala almaıdy.
Alaıda mundaı múmkindikke ıe bolý úshin birneshe talap saqtalýy qajet. Eń bastysy – borysh kólemi 6 mıllıon 300 myń teńgeden asýy tıis, sondaı-aq boryshkerdiń tólem qabiletin dáleldeıtin tabysy men múlki bolmaýy kerek.
QR Qarjy mınıstrligi Memlekettik kirister komıtetiniń dármensiz boryshkerlermen jumys basqarmasynyń basshysy Merýert Sısembaeva sottan tys bankrottyq rásimine qatysatyn kredıtorlar tizimi keńeıtilgenin atap ótti.
«Biz bul tizimge tek qarjy uıymdaryn ǵana emes, sonymen qatar adamnyń aldynan mıkroqarjylyq qaryzdy satyp alǵan nemese buryn qarjy uıymy bolyp, búginde jaı ǵana JShS retinde jumys isteıtin kompanııalardy da qostyq», – dedi ol.
Sonymen qatar, bankrottyq rásimi jeńildetildi. Budan bylaı boryshker 2025 jyldyń 1 qańtaryna deıin alǵan nesıelerin qarjy uıymdarymen retteýge mindetti emes.
Taǵy bir mańyzdy ózgeris – sottan tys bankrottyqty toqtatýǵa qatysty. Endi boryshker óz qalaýymen, eshqandaı sebep túsindirmesten, prosesti toqtata alady. Bul shara ótinish berip, keıin oıynan aınyp nemese jalǵan aqparat usynatyn azamattardyń sanyn azaıtýǵa baǵyttalǵan.
Keıbir turǵyndar bul ózgeristi qoldap otyr.
«Adam nesıe alady, biraq túrli sebeppen tóleı almaı qalýy múmkin. Eger jaǵdaıy shynymen qıyn bolsa, memleket tarapynan kómek alý oryndy. Biraq ótirik aqparat berýge bolmaıdy», – deıdi Shymkent turǵyny.
Al basqa azamattar bankrot dep tanylǵannan keıin qaıta nesıe alý múmkindigi bolmaýy tıis dep esepteıdi.
«Eger adamda kólik ne tabys kózi bar bolsa, biraq qaryzyn tóleýden jaltarsa – bul alaıaqtyqqa jatady. Al shynymen jaǵdaıy aýyr adamdarǵa jeńildik kerek», – deıdi taǵy bir turǵyn.
Qarjy mınıstrligi bankrottyq rásimin barynsha ashyq ári ádil etý úshin qosymsha baqylaý tetikterin engizýdi josparlap otyr.
