Operasııany oblystyq aýrýhananyń neırohırýrgııa bóliminiń meńgerýshisi Evgenıı Kovalev jasaǵan. Marqumnyń balalary «dáriger mas kúıinde ota jasady, áıtpese, ákemiz aýrýhanaǵa óz aıaǵymen barǵan, jaǵdaıy sonshalyqty múshkil emes edi» dep otyr.
«Dárigerdiń aıaǵynan áreń turǵanyn, tipti kabınette uıyqtap qalǵanyn medbıkeler de kórgen. Neırohırýrgtiń ózi de tergeýshilerge eki bokal syra ishkenin moıyndaǵan. Ákem basy qatty aýyryp aýrýhanaǵa kelgen soń, mamandar kompterlik tomografııaǵa túsirip, qan tamyrynda isik bar ekenin, ota kúrdeli emes ekenin aıtqan», deıdi marqumnyń qyzy Ásel Ospanova.
Áseldiń sózinshe, sátsiz otadan soń dáriger syrtqa shyǵyp, ýaıymdap kútip otyrǵan marqumnyń týystaryna qaıǵyly jaǵdaıdy estirtýdiń ornyna, boı tasalap ketip qalmaq bolǵan.
«Baýyrym ota bólmesine kirip, operasııa ústelinde beti jabyq jatqan ákemdi kóredi de, aýrýhanadan shyǵyp úlgermegen Evgenıı Kovalevti ustap qalady. Dereý polısııaǵa habarlasady. Keıin alkotester arqyly dárigerdiń mas ekeni anyqtaldy», deıdi Ásel.
Dárigerdiń saý emes ekeni áleýmettik jelide taraǵan vıdeodan da anyq kórinip tur. Marqumnyń uly túsirip alǵan vıdeoda shaıqalaqtap ázer turǵan Evgenıı Kovalev qoıylǵan suraqqa durys jaýap bere almaıdy. Saý adam men mas adamnyń dıalogy bylaısha órbıdi.
– Nege massyń?
– Nege? Suraq. Nege?
– Bul qalaı boldy? Jaǵdaıdy nege túsindirmeısiz?
– ...
– Bul ne? Mas kúıde keldińiz be?
– Joq
– Qalaı, joq. Men kórip turmyn ǵoı saý emes ekenińdi.
– ...
Vıdeoda marqumnyń uly dáriger mingen kóliktiń esigin ashyp, ishinen paket toly syranyń bos bótelkelerin alyp shyǵady.
Ári qaraı beınejazbada polısııanyń qatysýymen júrip jatqan medısınalyq kýálandyrý úderisi kórsetiledi. Bul jerde de alkotesterdiń dárigerdiń qanyndaǵy alkogoldiń 3 promılleden joǵary ekenin kórsetip tur.
Oblystyq polısııa departamentiniń málimetinshe, qaıǵyly oqıǵaǵa qatysty qylmystyq is qozǵalǵan.
«Arqalyq qalasynda ota jasaý kezinde naýqastyń qaıtys bolý faktisi boıynsha polısııa sotqa deıingi tergeýdi bastady. Qazir bolǵan oqıǵanyń barlyq mán-jaıyn anyqtaýǵa baǵyttalǵan qajetti tergeý amaldary júrgizilip jatyr. QR QPK-niń 201-babyna sáıkes ózge aqparat jarııa etilmeıdi» deıdi oblystyq PD-nyń baspasóz hatshysy Karına Bazarbaeva.
Keshe oblystyq jedel járdem ortalyǵynda osy oqıǵaǵa qatysty baspasóz jıyny ótken. Brıfıngke densaýlyq saqtaý basqarmasynyń basshysy kelmedi. Jýrnalısterdiń aldynda oblystyq jedel járdem stansııasynyń bas dárigeri mindetin atqarýshy Oleg Meleshko men medısına qyzmetkerleri kásipodaǵy jergilikti fılıalynyń tóraıymy Tatıana Býlgasevıch sóıledi.
«Doktor Qostanaıdan Arqalyqqa reanımobılmen jetkizildi. Sol jerde ota jasady. О́kinishke qaraı ota sátsiz aıaqtaldy. Naýqas jan tapsyrdy. Marqumnyń neden kóz jumǵanyn sot saraptamasy anyqtaıdy», dedi Oleg Meleshko.
Dárigerler naýqastyń jaǵdaıy aýyr bolǵanyn túsindirýge tyrysty. Alaıda quqyqtyq baǵany quzyrly oryndar beretinin aıtyp, neırohırýrgtiń mas kúıinde ota jasaǵany týraly jaq ashqan joq.
Qazir eldi dúrliktirgen qaıǵyly oqıǵanynyń mán-jaıyn polısııa tekserip jatyr. Sonymen qatar, oblystyq densaýlyq saqtaý departamenti de ishki qyzmettik tekserý jumysyn bastady.
Qostanaı oblysy
