Foto: Aqorda
Mınıstrdiń aıtýynsha, bıyl respýblıkalyq bıýdjetke 21,6 trıllıon teńge kóleminde kiris túsken. Onyń 15,2 trıllıon teńgesin salyq túsimderi quraıdy. Bul – ótken jylmen salystyrǵanda 23,4 paıyz joǵary. Toǵyz aıdyń qorytyndysy boıynsha bıýdjet 101,6 paıyz oryndalyp, onyń áleýmettik baǵyty saqtalyp otyr.
Qasym-Jomart Toqaevqa salyqtyq jáne kedendik ákimshilendirýdiń tıimdiligin arttyrý sharalary, Arnaýly memlekettik qordyń túsimderi týraly málimet berildi.
«Memlekettik satyp alý týraly» Zańyn iske asyrýǵa basa nazar aýdaryldy. Jańa qujat rásimderdiń merzimin qysqartýdy, olardyń ashyqtyǵyn qamtamasyz etýdi jáne otandyq taýar óndirýshilerdi qoldaýdy kózdeıdi. Qazirgi ýaqytta qazynashylyqtyń aqparattyq júıesindegi taldaý jáne baqylaý úderisteri tolyq avtomattandyryldy.
Memleket qarjysyn sıfrlandyrý aıasynda Big Data qalyptastyrýǵa jáne tolyqtyrýǵa, sondaı-aq salyq pen keden salalaryna jasandy ıntellektini engizýge erekshe mán beriledi.
Prezıdentke memlekettik aýdıttiń nátıjeleri tanystyryldy. Bıylǵy 8 aıda 791 tekserý júrgizilip, somasy 337,5 mıllıard teńge bolatyn qarjynyń zańsyz jumsalǵany anyqtaldy.
Qasym-Jomart Toqaev memlekettik qarjynyń ornyqtylyǵyn qamtamasyz etý boıynsha júıeli jumysty jalǵastyrý men barlyq áleýmettik mindettemeni oryndaý kerek ekenine toqtaldy. Sondaı-aq sıfrlandyrýdy odan ári damytý jáne zamanaýı baqylaý tetikterin engizýdiń mańyzyn atap ótti.
