Sóz basynda Májilis spıkeri, «Amanat» partııasynyń tóraǵasy Erlan Qoshanov muǵalimderdi ótken kásibı merekesimen quttyqtap, pedagogterdiń qoǵam ómirindegi jáne el damýyndaǵy aıryqsha róline toqtaldy. Ol «Amanat»-tyń negizgi tiregi pedagogter ekenin atap ótti. Sebebi elimizdegi 600 myń muǵalimniń 260 myńǵa jýyǵy – partııa músheleri.
«Aldymyzda turǵan negizgi mindet – adal, bilimdi, ádiletti azamat tárbıeleý. Bul úderis úıden bastalyp, mektepte jalǵasyn tabady. Ár balanyń otanshyl bolyp ósýi, úlkenge qurmet, kishige izet kórsete bilýi, aınalasyna, qorshaǵan ortaǵa jaýapkershilikpen qaraýy mańyzdy. Prezıdent aıtqandaı, ár adam ózi adal bolsa, zańdy qurmettese ǵana Ádiletti Qazaqstandy qura alamyz. Al ondaı býyn tárbıeleý – muǵalimderdiń tarıhı mıssııasy. Osy iste partııa árdaıym sizdermen birge bolady», dedi ol.
Partııa tóraǵasy sıfrlandyrý jáne jasandy ıntellektini damytý máselesine erekshe nazar aýdardy. Ol Memleket basshysy Qasym-Jomart Toqaev óz Joldaýynda Qazaqstandy úsh jyl ishinde jappaı sıfrlyq elge aınaldyrý týraly óte aýqymdy mindet qoıǵanyn eske saldy. Bul bilim berý júıesine qajet mańyzdy múmkindikterge jol ashady.
– Mektep tek damý úderisine ilesip qoımaı, ony basyp ozýǵa tıis. Másele endi jasandy ıntellekt bilim júıesinde qajet pe, joq pa degen saýalda emes, ony tıimdi engizýde. Bir nárseni únemi este saqtaý kerek: muǵalim mekteptiń júregi bolyp qala beredi. Jasandy ıntellekt muǵalimdi almastyrmaıdy, kerisinshe ony basy artyq jumystan aryltyp, eń negizgi mindetin – oqýshyǵa bilim berý, tárbıeleý jáne tulǵalyq qasıetin qalyptastyrý isin alańsyz atqarýyna múmkindik berýge tıis», dedi E.Qoshanov.
Májilis spıkeri Memleket basshysynyń bilim júıesin qoldaýǵa qatysty saıasaty men onyń tapsyrmasy boıynsha «Pedagog mártebesi týraly» zańnyń qabyldanýy oń nátıje bergenine nazar aýdardy. Keıingi tórt jylda bilim salasyna bólingen qarjy kólemi úsh ese artty. Muǵalimderdiń jalaqysy eki ese ósti. Bıyldyń ózinde mektepke 10 myńnan asa jas maman keldi. Olardyń arasynda joǵary ball jınaǵan túlekter men «Altyn belgi» ıegerleri bar. Halyqaralyq zertteý nátıjeleri muǵalimderdiń basym kópshiligi óz jumysyna kóńili tolatynyn kórsetti.
О́z kezeginde, «Amanat» partııasy da pedagogterge belsendi qoldaý kórsetip keledi. Májilistegi partııa fraksııasynyń qoldaýymen halyqaralyq ǵylymı konkýrstardyń jeńimpazdaryn tárbıelegen pedagog-tálimgerlerge arnaıy tólem qarastyrylatyn zań maquldandy. Mundaı oqýshylar endi «Bolashaq» baǵdarlamasy boıynsha grantqa úmitker bola alady. Zańnamalyq deńgeıde mektep qabyrǵasynda tamaqtandyrý barysyn baqylaýdy kúsheıtý, balabaqshalar men bilim uıymdaryna jer ýchaskelerin bólý, alǵashqy áskerı daıyndyq páni muǵalimderiniń mártebesin arttyrý boıynsha sharalar qabyldandy.
Partııa tóraǵasy ustazdar qaýymyn tolǵandyrǵan máseleler de az emes ekenin atap ótti. Olardyń qatarynda mektep qabyrǵasyndaǵy shamadan tys qaǵazbastylyq, túrli is-sharada kezekshilik etý, mektep chattary men áleýmettik jelilerdi júrgizý júktemesi, sondaı-aq ustazǵa tán emes ózge de mindetter bar. Sondaı-aq muǵalimderdiń qaýipsizdigin arttyrý, olardy qorlaý men psıhologııalyq qysymnan tıimdi qorǵaý normalaryn kúsheıtý qajet. Muǵalimniń eń negizgi mindeti – balalarǵa bilim berý. Ustazdardy odan ózgesi alańdatpaýy kerek. «Amanat» partııasy bul ustanymdy árkez qorǵaıdy. Tipti, zańnamalyq ózgerister engizýge de kúsh salady.
Partııa muǵalimderdi jańa tehnologııalarmen jáne eń aldymen, jasandy ıntellektimen belsendi jumys isteýge daıyndaıdy. Atap aıtqanda, muǵalimderge jańa tehnologııalardy ıgerýge kómektesetin tegin kýrstar men ádistemelik materıaldary bar sıfrlyq platforma qurý josparlanyp otyr. Sondaı-aq alǵashqy ped-hakaton ótkiziledi. Onda muǵalimder JI-di mektep qabyrǵasynda qoldanýǵa qatysty óz ıdeıalaryn usyna alady. Al úzdik ustazdar shetelde taǵylymdamadan ótý múmkindigine ıe bolady. Sonymen qatar muǵalimder Sıfrlyq kodeksti ázirleý jumysyna tartylady. Osy arqyly olardyń praktıkalyq tájirıbesi bilim berý úderisine qatysýshylardyń múddesi qujatta kórinis tabýyna kómektesedi.
Is-shara barysynda Premer-mınıstrdiń orynbasary – Jasandy ıntellekt jáne sıfrlyq damý mınıstri Jaslan Mádıev pen Oqý-aǵartý mınıstri Juldyz Súleımenova sóz sóıledi. Sonymen qatar «Muǵalim Talks» qatysýshylary ózderiniń kásibı turǵyda qalyptasý tarıhymen bólisti jáne áriptesterimen birge kásibı syn-tegeýrinderdi talqylady.
Almaty oblysy Uzynaǵash aýylyndaǵy fızıka pániniń muǵalimi Baqytáli Daýleshıar oqýshylarmen birge qolda bar zattardan qural-saıman, tipti jasandy qol protezin jasap, balalardy qalyptan tys oılaýǵa úıretetinin, ǵylymǵa degen súıispenshilikterin oıatatynyn aıtty. Aqmola oblysy Arshaly aýylyndaǵy tarıh pániniń muǵalimi Olga Davydova STEM men JI ádisterin paıdalaný arqyly tarıh ǵylymyna jan bitirýge bolatynyn kórsetti. Túrkistannan kelgen qazaq tili men ádebıeti pániniń muǵalimi Ámálııat Arqalyq pedagogti qajetsiz qaǵazbastylyqtan aryltý úshin sıfrlyq quraldardy paıdalanýdy usyndy. Astana qalasyndaǵy ınformatıka pániniń muǵalimi Saltanat Sadyqova JI-di paıdalana otyryp, tapsyrmalardy shaǵyn jobalarǵa aınaldyrýda. Sol arqyly oqýshylar óz sheshimin negizdeýge jáne qorǵaýǵa úırenedi.
Semeı qarjy-ekonomıkalyq kolledji dırektorynyń orynbasary Ashat Muhanov jumysshy mamandyqtar ózgeristerdiń alǵy shebinde turatynyn atap ótti. Sebebi JI oqý sheberhanalarynda mańyzdy quralǵa aınalýda. Qostanaıdan kelgen tarıh pániniń muǵalimi ári erekshe balanyń anasy Uljan Baıgenjına qyzmet barysynda sharshap-shaldyǵý máselesine jáne pedagogterdiń ózara qoldaý kórsetý isin keńeıtý qajet ekenine nazar aýdardy. Atyraýdan kelgen hımııa pániniń muǵalimi Ibrahım Baqdáýletuly oqýshylardy olımpıadaǵa daıyndaý kezinde JI qoldanýdyń tájirıbelik mysaldarymen bólisti. Jetisý oblysy Jylandy aýylyndaǵy mamandandyrylǵan lıseı-ınternatynyń dırektory Elmıra Rapılova Almatydan týǵan aýylyna oralyp, joǵary oqý oryndarymen jáne demeýshilermen áriptestik ornata otyryp, óz kolledjinde ınjenerlik bilim sapasyn qalaı arttyrǵanyn aıtty.
Is-shara sońynda E.Qoshanov birqatar qatysýshyǵa «Ustaz – ult aınasy» partııalyq nagradasyn tabystady. Bıyldan bastap atalǵan nagradamen jyl saıyn elimizdiń úzdik pedagogteri marapattalady. Sondaı-aq kásibı qyzmeti barysynda elge sińirgen eńbegi úshin muǵalimderge Premer-mınıstrdiń orynbasary – Jasandy ıntellekt jáne sıfrlyq damý mınıstri Jaslan Mádıev pen Oqý-aǵartý mınıstri Juldyz Súleımenova vedomstvolyq nagradalar tabystady.
