Búginde Transplanttaýdy jáne joǵary tehnologııalyq medısınalyq qyzmetti úılestirý jónindegi respýblıkalyq ortalyqta 40-tan astam donorlyq stasıonar, 7 transplanttaý ortalyǵy, 5 zerthana jáne medısınalyq avıasııa bar. Donorlyq jaıynda aıtar bolsaq, 18 jastan asqan pasıent densaýlyǵy syr berip, aýrý asqynyp, mı ólimi anyqtalsa donor bola alady. Aǵza alýǵa májbúrlengen, es-qabileti durys bolmaǵan, psıhıkalyq aýrýlary bar, qaterli isikke jáne ınfeksııalyq aýrýlarǵa shaldyqqan azamattar donor bola almaıdy.
Transplanttaýdy jáne joǵary tehnologııalyq medısınalyq qyzmetti úılestirý jónindegi respýblıkalyq ortalyq dırektorynyń mindetin atqarýshy Nazgúl Jangeldınanyń aıtýynsha, qazir donorlyq boıynsha kútý paraǵynda 4 384 adam tur.
«Kútý paraǵynda turǵandardyń 121-i – bala. Jalpy, 2020 jyldan beri elde 1209 transplantasııa jasaldy. О́kinishke qaraı, olardyń 80% týystyq donor bolsa, nebári 15% – máıittik donorlar. 2020 jyldan beri máıittik donor bolamyn deýshiler sany azaıdy. 2024 jyly 86 yqtımal donor boldy. Olardyń 10-y ǵana kelisimin berdi. Tórteýiniń qarsy medısınalyq kórsetkishteri bolǵandyqtan, tek 6 adamnyń ǵana aǵzalaryn qoldaný múmkin boldy. Nátıjesinde 23 transplanttaý operasııasy jasaldy. Al, keıingi 10 aıda 131 yqtımal donor anyqtalyp, 10-y ózekti boldy. Sonyń arqasynda 42 operasııa jasaldy», dedi spıker.
Eskeretin jaıt, eGov portaly arqyly ár otandasymyz donor bolýǵa qatysty óz erkin bildire alady. Qazir osyǵan 134 myń adam tirkelgen. Olardyń 10 myńnan astamy donor bolýǵa kelisse, 122 myńy bas tartqan.
