Abaı oblysy – aýyl sharýashylyǵyn damytýda zor áleýetke ıe óńir. О́ńirde 11 myńǵa jýyq agroqurylym jumys isteıdi. Bıylǵy jyldyń qańtar-tamyz aılary aralyǵynda aýyl sharýashylyǵy óniminiń jalpy kólemi 221 mlrd teńgege jetip, respýblıka boıynsha tórtinshi oryndy ıelendi. Naqty kólem ındeksi 102,9 paıyzdy qurady. Jalpy jınalatyn egis kólemi 782,1 myń gektar bolsa, onyń 80 paıyzy orylyp, 265,2 myń tonna astyq bastyryldy. Sonymen qatar 96,6 myń tonna kartop pen 101,6 myń tonna kókónis jınaldy.
Aımaq basshysy Memleket basshysy Qasym-Jomart Toqaevtyń aýyl sharýashylyǵyna ınvestısııa tartý jónindegi tapsyrmasyna sáıkes óńirde atqarylyp jatqan jumystar týraly aıtty.
«Prezıdent bıylǵy Joldaýynda ınvestısııa tartýdyń mańyzdylyǵyn atap ótti. Osy turǵyda jyl basynan aýyl sharýashylyǵynyń negizgi kapıtalyna 32 mlrd teńge ınvestısııa tartyldy, bul ótken jyldyń sáıkes kezeńimen salystyrǵanda 170% joǵary. Osy baǵytta 2030 jylǵa deıin oblysymyzda ázirlengen óńirlik ınvestısııalyq jobalarynyń kartasyna sáıkes 197,5 mlrd teńge kóleminde 85 iri agrojoba iske asyrylady. Búgingi kezdesýimizdiń negizgi maqsaty – aýyl sharýashylyǵy salasyndaǵy memlekettik saıasattyń negizgi baǵyttaryn túsindirý ǵana emes, sonymen qatar, sizderdi tolǵandyryp júrgen naqty máselelerdi birge qarastyrý, ashyq dıalog ornatý», – dedi oblys ákimi.
Kezdesý barysynda aýyl sharýashylyǵy salasyn ártaraptandyrý, ınvestısııa tartý, óńdeý kásiporyndaryn damytý jáne et kombınaty qurylysynyń barysy sııaqty ózekti máseleler talqylandy. Jıynǵa kelgen sharýashylyq jetekshileri ózderin tolǵandyrǵan saýaldaryn qoıyp, mınıstrlik ókilderine usynys-pikirlerin jetkizdi.
Mınıstr agroónerkásiptik keshenniń damýyna qatysty naqty sharalarǵa, memlekettik baǵdarlamalarǵa jan jaqty toqtaldy.
«Abaı oblysyna arnaıy keldim. Búgin óńirdiń sharýashylyqtary jetekshilerimen, fermerlermen ashyq, shynaıy áńgime boldy. Biraz suraqtaryna jaýap berdim. Memlekettik baǵdarlamalar, kórsetiletin jeńildikter týraly aıttym. Sharýalarǵa memleket tarapynan qoldaý bolady. Abaı oblysy – jańadan qurylǵan óńir. Aýyl sharýashylyq áleýeti zor aımaq. Oblysta iri et kombınaty salynaıyn dep jatyr. Ol úshin mal sharýashylyǵyn joǵary deńgeıde damytýymyz kerek. Kásiporynnyń qurylysyn baryp kóremin. Mınıstrlik tarapynan tıisti kómek kórsetiledi», dedi Aıdarbek Saparov.
Abaı oblysy
