Máýlen Áshimbaev forýmǵa qatysýshylarǵa iltıpat bildirip, elimizdiń kún tártibindegi jáne zań shyǵarý qyzmetindegi mańyzdy máselelerdi birlesip júıeli talqylaý, sondaı-aq ortaq usynymdar men taldamalyq qujattar ázirleý úshin zııatkerlik orta qalyptastyrýdyń máni zor ekenin aıtty. Palata spıkeri bes jyl ishinde «Ádiletti Qazaqstan» tujyrymdamasyn iske asyrý jolynda ózderiniń tıimdiligin dáleldegen Senat janyndaǵy Sarapshylar klýby men Taldaý mektebiniń jasampaz ári biriktirýshi róline de nazar aýdardy.
«Taldau forum» sarapshylardy, belsendi kásibı mamandardy biriktiretin «Taldau sommunity»-diń bes jyldyǵyna oraı ótkizilip otyr. Qazirgi tańda Prezıdent Qasym-Jomart Toqaevtyń bastamasymen elimizde mańyzdy jáne keshendi reformalar tabysty iske asyrylyp keledi. Biz teńgerimdi jáne demokratııalyq saıası júıe qalyptastyryp jatyrmyz. Naryqtyq ekonomıkany damytýǵa, saıası jáne qoǵamdyq ınstıtýttardy nyǵaıtýǵa da basa mán berilip jatyr. Búgingi pikirtalas Qazaqstannyń zııatkerlik jáne saraptamalyq áleýetin arttyrýǵa, elimizdegi reformalardyń kún tártibin tıimdi iske asyrýǵa óz úlesin qosady dep senemin», dedi M.Áshimbaev.
Otyrys barysynda qatysýshylar Qazaqstannyń damýyna qatysty máselelerdi talqylady jáne Nobel syılyǵynyń laýreaty, «Why Nations Fail», «Narrow Corridor», «Power and Progress» kitaptarynyń avtory Daron Adjemoglýmen perspektıvalyq trendter jóninde pikir almasty.
Professor Adjemoglý óz sózinde Qazaqstanda júrgizilip jatqan reformalarǵa joǵary baǵa berip, saıası jáne ekonomıkalyq ınstıtýttardy damytýdyń, adam kapıtalyn turaqty ınvestısııalaýdyń mańyzyna erekshe toqtaldy. Sondaı-aq ol ekonomıkany jańǵyrtýǵa qatysty birqatar ıdeıasyn ortaǵa saldy.
«Prezıdent Qasym-Jomart Toqaevtyń basshylyǵymen Qazaqstan damýdyń mańyzdy kezeńinen ótip jatyr. Elimiz aldynda aýqymdy maqsattar men mindetter turǵan qazirgi tańda taldaýdyń jáne saraptamalyq qoldaýdyń sapasy aıryqsha mánge ıe. Sapaly analıtıka – eldiń ornyqty damýyna arnalǵan tıimdi sheshimder qabyldaýdyń negizi. Osyǵan baılanysty bes jyl buryn Senat sarapshylar qaýymdastyǵymen júıeli baılanys ornatty. Basty maqsat – sarapshylardyń jańa býynyn qalyptastyrý jáne olardy zań shyǵarý jumystaryna tartý. Sonyń nátıjesinde búginde Sarapshylar klýby, «Taldaý» mektebi, «Taldau talks» alańy, «Taldau run» sport qaýymdastyǵy jáne seriktesterimizdiń qatysýymen ótetin oqytý semınarlary men trenıngterden turatyn «Taldau» ıntellektýaldy ekojúıesi qalyptasty dep aıtýǵa tolyq negiz bar», dedi M.Áshimbaev.
Sonymen qatar Senat spıkeri «Taldaý» mektebiniń besinshi legine irikteý bastalǵanyn jarııalady. Sondaı-aq qaýymdastyqtyń adaldyq, ashyqtyq, únemi óz betimen jumys isteý, jaýapkershilik jáne qoǵamdyq ıgilikke qyzmet etý sııaqty qundylyqtarǵa negizdelgen qaǵıdalaryn qabyldaýdyń mańyzdy ekenin tilge tıek etti. Senat tóraǵasy óńirlerde «Taldau lectures» jobasyn iske asyrý jáne zertteýler júrgizip, jańa ıdeıalar qalyptastyratyn alań retinde «Taldau lab» taldamalyq zerthanasyn qurý jóninde de usynystaryn aıtty.
Forým aıasynda eldiń órkendeýine úles qosý maqsatymen qoǵamdastyqty damytýǵa belsendi atsalysqan sarapshylarǵa «Taldau awards» arnaıy syılyǵy saltanatty túrde tapsyryldy.
Aıta keteıik, «Taldau forum» alańynda sarapshylardyń qatysýymen dóńgelek ústel ótti. Onda Memleket basshysynyń Qazaqstan halqyna Joldaýynda belgilengen adam kapıtalyn damytý jáne elimizdegi sıfrlyq ózgeristerge qatysty máseleler sóz boldy.
Paneldik sessııaǵa Parlament depýtattarymen qatar, otandyq jáne sheteldik sarapshylar, ǵalymdar, memlekettik organdardyń, bıznes-qurylymdardyń jáne azamattyq qoǵam ınstıtýttarynyń ókilderi qatysty.
Sonymen qatar búgin forým aıasynda «Habar» agenttigi Televızııalyq mamandyqtar akademııasynyń mamandary sheshendik sheberlik jáne kópshilik aldynda sóıleý daǵdysynan dáris oqydy. Odan bólek, «Meta» kompanııasynyń ókilderi men belgili otandyq medıa-trenerler tartymdy kontent jasaý, aýdıtorııamen baılanys jáne áleýmettik jelilerde jumys isteýdiń tıimdi medıa tetikteri týraly keńes berip, tájirıbelerimen bólisti.
