Respýblıka kúni — táýelsizdikke degen alǵashqy naqty qadamnyń sımvoly. Egemendik deklarasııasynda Qazaqstannyń aýmaqtyq tutastyǵy, azamattardyń quqyqtary men bostandyqtary, tabıǵı resýrstarǵa ıe bolý quqyǵy jáne memlekettik bıliktiń derbestigi alǵash ret zań júzinde bekitildi.
1991 jyly 16 jeltoqsanda elimiz táýelsizdigin jarııalaǵanymen, 25 qazan sol táýelsizdiktiń quqyqtyq jáne rýhanı irgetasy sanalady.
Jyl saıyn Respýblıka kúnine oraı elimizdiń barlyq óńirinde keń aýqymdy mádenı jáne patrıottyq sharalar ótedi.
Máselen, Astana qalasyndaǵy Jaqsylyq Úshkempirov atyndaǵy Jekpe-jek saraıynda qazaq kúresinen XIV respýblıkalyq «Qazaqstan Barysy» týrnıri ótedi. Bul – el namysyn arqalaǵan eń myqty balýandardyń bozkilemdegi sheshýshi aıqasy.
Jarys 18 qazan kúni saǵat 12:00-de bastalady.
Atalǵan aıtýly doda Respýblıka kúnine oraı uıymdastyrylyp otyr. Týrnırge oblystyq irikteý saıystarynyń jeńimpazdary, sondaı-aq Astana, Almaty jáne Shymkent qalalarynyń úzdik sportshylary qatysady.
Budan bólek, ótken jylǵy «Qazaqstan Barysy» týrnıriniń jeńimpazy men «Ásker Barysy» jarysynyń eki balýany da bozkilemge shyǵady. Jalpy, 43 balýan kúsh synasady.
Respýblıka kúni — bul tek tarıhı data emes. Ol — qazaqstandyqtardyń el birligin, erkin oı men jaýapkershilikti, memleket taǵdyryna degen súıispenshilikti dáripteıtin mereke.
Bul kún — árbir azamatqa el taǵdyrynyń ortaq ekenin, táýelsizdik pen egemendik úshin urpaqtar eńbegin qurmetteýdiń qajettigin eske salady.
