Alaıda em-shara eshbir nátıje bermegen soń operasııa jasatýǵa №1 qalalyq klınıkalyq aýrýhanasyna júgingen. Dárigerler naýqasqa qaıtadan tolyq dıagnostıkalyq tekserý júrgizip, operasııaǵa daıyndady. Sóıtip, eki saǵattan asa ýaqytqa sozylǵan operasııa barysynda kólemi 10-11 santımetrlik isik alynyp tastaldy. Laparoskopııalyq ádistiń bir ereksheligi operasııa tiliksiz oryndalady. Sonyń arqasynda naýqas tez ońalyp ketedi. Ári tiliksiz operasııa kosmetıkalyq turǵydan da tıimdi.
Uıqy beziniń qaterli isigi – eń agressıvti ári emdeýi qıyn aýrý túri. Onyń alǵashqy belgileri isik aıtarlyqtaı úlkeıgende nemese basqa aǵzaǵa taralǵanda ǵana baıqalady. Negizgi sımptomdary ishtiń joǵarǵy bóliginde nemese arqada aýyrsyný seziledi, tábetsizdik paıda bolady, júrek aınyp, salmaq kúrt tómendeıdi. Sondaı-aq keıbir jaǵdaıda naýqas qant dıabetine ushyraýy múmkin. Osyǵan deıin uıqy bezine laparoskopııalyq operasııa Syzǵanov atyndaǵy ulttyq ǵylymı hırýrgııa ortalyǵynda ǵana jasalyp keldi. Endi mundaı operasııany shymkenttik dárigerler de meńgerdi.
№1 qalalyq klınıkalyq aýrýhanasy birinshi hırýrgııalyq bóliminiń meńgerýshisi Dáýren Qabylov jalpy joǵaryda atalǵan aýrý belgileri naýqasta baıqalǵanymen, ondaǵy isik qaterli emes ekenin gıstologııalyq zertteý anyqtaıtynyn aıtty.
«Naýqastyń jasy 21-de. Bıyl ǵana oqý bitirip, jumysqa endi turǵan eken. Jasynyń ereksheligin eskerip ári bolashaq ana retinde densaýlyǵyn saqtap qalý maqsatynda laparoskopııalyq ádispen operasııa jasaýdy uıǵardyq. Naýqas eki kún tekserilip, operasııadan keıin bes kúnnen soń úıine qaıtaryldy. Tiliksiz operasııanyń ereksheligi sol, pasıent tez ońalyp ketedi. Tipti operasııa bitken soń eki saǵattan keıin aıaǵyna turyp júrse bolady. Operasııa barysynda alynǵan túzilim gıstologııalyq zertteýge jiberilip, qazir anyqtalyp jatyr. Naqty dıagnozǵa qaraı emdik sharasy taǵaıyndalady. Uıqy bezi men kók baýyr bir-birine jaqyn jatqan organ. Ekeýi bir-birimen tyǵyz baılanysta bolǵandyqtan, ashyq operasııa kezinde uıqy beziniń bir bóligimen qosa kók baýyr da alyp tastalady. Al tiliksiz operasııada kók baýyrdy aman saqtap qalýǵa bolady. Keshegi jaǵdaıda naýqastyń kók baýyry saý kúıinde qaldy. Sol turǵyda mamandarymyzdyń aýyr operasııalardy jańasha ádispen jasap jatqany úlken jetistik. Men ózim hırýrg-onkologpin. Maman retinde aıtarym, qazir isik aýrýlarynyń burynǵy kezben salystyrǵanda birshama óskeni baıqalady. Ásirese jastar arasynda onkologııalyq dertke ushyrap jatqandar az emes. Osynyń bári, meniń pikirimshe, durys tamaqtanbaýdan bolady. Búginde jastar kósheniń jyldam ázirlenetin taǵamyna áýes. Onyń dámi erekshe, qaryndy tez toıdyrǵanymen, ony daıyndaıtyn maıdyń adam aǵzasyna zııany orasan. Qolymyzdan tastamaıtyn telefon men noýtbýkter de óz boıynan zııandy sáýle shashatynyn umytpaý kerek. Sondyqtan adamdar, onyń ishinde ásirese jastar salamatty ómir saltyn ustanyp, bos ýaqytynda smartfonǵa telmirmeı, taza aýada kóbirek serýendese, aǵzaǵa paıdaly taǵamdar tutynsa degen keńes beremin. Adamnyń densaýlyǵynyń myqty bolýy ekologııa, qorshaǵan ortanyń áseri bar degenimen tikeleı ózine baılanysty», dedi D.Qabylov.
Dárigerdiń aıtýynsha, búginde klınıkalyq aýrýhanada kóp operasııalar laparoskopııalyq ádispen jasalady. Bul tásildi meńgergenshe, hırýrg mamandar kóp eńbek etti. Shetelge shyǵyp tájirıbe jınady. Elimizge kelgen sheteldik mamandardan úırendi. Aıtalyq, aýrýhana hırýrgteri Reseı, Belorýs, Túrkııa elderinde oqý-tájirıbelik taǵylymdamadan ótip qaıtty. Jýyrda Lıtvaǵa baryp, keýde hırýrgııasy jóninde arnaıy kýrstan ótedi. Osyndaı sheberlik pen biliktiliktiń nátıjesinde búginde klınıkalyq aýrýhanaǵa Shymkenttiń ózinen ǵana emes, portal arqyly elimizdiń barlyq óńirinen emdelýge kelip jatqandar kóp. Tipti Úndistan, Túrkııa sekildi elderde operasııa jasatyp, odan qaıran bolmaǵan soń qalalyq klınıkada qaıtadan operasııaǵa jatyp, qulan-taza aıyǵyp ketip jatqandar jetedi.
Hırýrgııa bóliminiń meńgerýshisi D.Qabylovtyń málimdeýinshe, keıingi jyldary megapolıs medısınasy damyp keledi. Sonyń ishinde №1 qalalyq klınıka úlken jańǵyrtýdy bastan ótkerdi. Operasııa bólimderi sońǵy úlgidegi quraldarmen jabdyqtalyp, zamanaýı medısınalyq apparattar men qondyrǵylar ornatyldy. Operasııanyń eń kúrdeli túrleri jasala bastady. Osynyń ózinen shahardyń medısına salasy qanshalyqty alǵa qaraı qadam basqanyn bilýge bolady. Jalpy, bul tek bir qalanyń emes, tutas el medısınasynyń jetken jetistigi.
«Men shetelde kóp bolamyn. Ras, ol jaqtaǵy klınıkalarda sońǵy úlgidegi zamanaýı qondyrǵylar bar. Nebir túrli apparattar tańdaı qaqtyrady. Alaıda mamandarynyń tájirıbesi men biliktiligi bizdiń hırýrgterden sonshalyqty asyp ketken dep aıta almaımyn. Kerisinshe, bizdiń dárigerlerdiń bilimi men sheberligi olardan bir saty joǵary turatyn sekildi. Onyń bir dáleli hırýrgııa salasynda qandaı kúrdeli operasııa bar, sonyń bárin bizdiń mamandar shetinen ıgerip keledi. Operasııa jasaýdyń tıimdi ádisi sanalatyn laparoskopııany operasııanyń barlyq túrine qoldanyp jatyr. Sonyń biri – keshegi uıqy beziniń isigin alyp tastaý operasııasy. Uıqy bezi adam aǵzasyndaǵy eń názik organ. Qıyndyqtarǵa qaramastan, jergilikti hırýrgter pasıentterdi alysqa jibermeı, barlyq em-domdy óz qalamyzda jasaýǵa tyrysyp jatyr», dedi D.Qabylov.
