Foto: Májilis
Depýtat Bolatbek Najmetdınuly Úkimet saǵatynda qalalar men oblystar, respýblıkalar arasynda qatynaıtyn avtobýstardyń eskirip bara jatqanyn aıtyp, avtoparkti jańartý isi toqtap qalǵanyna nazar aýdardy. Onyń aıtýynsha, О́ndiris mınıstrligi 2024 jyldyń 1 jeltoqsanynan bastap qoldanysta bolǵan avtobýstardy elge kirgizýge tyıym salǵan.
«Bizdiń tasymaldaýshylar shetelde 2–3 jyl qoldanylǵan avtobýstardy satyp ala almaı otyr, óıtkeni olardy ákelý úshin zaýyttan nemese onyń resmı ókilinen sertıfıkat talap etiledi. Al Qazaqstandaǵy resmı ókil jeke tasymaldaýshydan (mysaly, Germanııa nemese Polshadaǵy) satyp alynǵan kólikti rastaı almaıdy. Nátıjesinde jańa avtobýstar tym qymbatqa túsip, avtobýstar parki eskirip barady. Bul óz kezeginde jol apattarynyń kóbeıýine áser etip otyr», dedi Bolatbek Najmetdınuly.
Ol jaýapty mınıstrlikterge máseleni sertıfıkattaý, tehnıkalyq tekserý jáne baqylaý arqyly sheshýdiń naqty tetikterin atap ótti. Depýtat jol-kólik oqıǵalarynyń artýyna Toyota Alphard, Hiace syndy shaǵyn avtobýs ıeleriniń zańsyz jolaýshy tasymalymen aınalysyp otyrǵany da túrtki ekenin alǵa tartty.
«Bul kólikter resmı túrde tasymaldaýshy retinde tirkelmegen, saqtandyrýy joq, tahograftarmen jabdyqtalmaǵan jáne zańsyz jumys isteıdi. Júrgizýshilerdiń basym bóligi 14–20 saǵattap jol júredi, al ruqsat etilgen norma - bar bolǵany 8 saǵat. Bul – tikeleı apat týdyratyn sebeptiń biri. Kólik mınıstrligi tıisti fýnksııalaryn tolyq atqarmaı otyr. Shaǵyn avtobýstardyń jolaýshy tasymalyna jaramdylyǵy sertıfıkattalmaıdy, tahograftardyń bar-joǵy, saqtandyrý men eńbek-demalys rejımi baqylanbaıdy. Al IIM qoldanystaǵy zańǵa sáıkes kózge kórinerlik buzýshylyq bolmasa, mundaı kólikterdi toqtata almaıdy. Bul - naǵyz tuıyq sheńber», dedi Bolatbek Najmetdınuly.
Májilismen Ishki ister mınıstri Erjan Sádenovke osy máselelerdi jaýapty mınıstrliktermen birlese sheshýdi usyndy.
