Marat Bashımov Qoǵamdyq palatanyń eldegi demokratııalyq prosesterdi, saıası mádenıetti damytýdaǵy mańyzyna keńinen toqtaldy.
«Qoǵamdyq palata – zań shyǵarý barysynda jurtshylyqtyń pikirin eskeretin qoǵamdyq ınstıtýt. Bul – halyq pen bılik arasyndaǵy ashyq dıalog alańy. Onyń jumysy – Prezıdent reformalarynyń tabysty júzege asýynyń kórinisi», dedi Marat Bashımov.
Qazaqstan Prezıdenti Qasym-Jomart Toqaev barlyq pikirtalas kóshede emes, Parlamentte bolýy kerek ekenin birneshe ret atap ótken bolatyn. Osy baǵytta Májilis janyndaǵy Qoǵamdyq palata kóp jumys atqaryp, óz mıssııasyn oryndap keledi.
Palata búginde Prezıdenttiń Joldaýlarynda kórsetilgen strategııalyq baǵyttardy, sonyń ishinde sıfrlyq transformasııa men jasandy ıntellektini engizýdi belsene qoldap otyr.
«Jýyrda jasandy ıntellekt týraly zań qabyldandy, parlamenttik tyńdalym ótti. Endi Sıfrlyq kodeks ázirlenip jatyr. Osy prosestiń bárine Qoǵamdyq palatanyń sarapshylary belsene atsalysýda», dedi Marat Bashımov.
Sonymen qatar depýtat Qoǵamdyq palata Parlament pen sarapshylar qoǵamdastyǵy arasyndaǵy baılanysty nyǵaıtqanyn atap ótti.
Qazirgi tańda Májilis pen Qoǵamdyq palata arasynda senimdi áriptestik ornaǵan. Depýtattar palata músheleriniń usynystaryna erekshe mán berip, kóptegen zańnamalyq bastama sonyń negizinde qabyldanyp otyr.
Depýtattyń aıtýynsha, 2022 jyly qurylǵan sátten bastap Qoǵamdyq palatada júzdegen talqylaý ótkizildi, mańyzdy zańdarǵa túzetýler engizildi, óńirlerde kóshpeli otyrystar uıymdastyryldy.
Sonyń ishinde jergilikti ózin-ózi basqarý, densaýlyq saqtaý, saılanǵan ákimderdiń jumysy, elektrsamokattar men kalıanǵa qatysty zańdardyń oryndalmaýy, onlaın-kýrstar men koýchıng naryǵynyń rettelmeýi sekildi taqyryptar jan-jaqty talqylandy.
Marat Bashımov keıbir problemalardy naqty mysaldarmen túsindirip, qoǵam senimin nyǵaıtý úshin quqyqtyq normalardyń shynaıy oryndalýy qajettigin basa aıtty.
«Zań bar, biraq oryndalmaıdy. Bul qoǵamnyń zańǵa degen senimin álsiretedi. Sondyqtan Qoǵamdyq palata tek zańdardy talqylap qana qoımaı, olardyń tıimdiligin arttyrý tetikterin usynýy qajet», dedi depýtat.
Sonymen qatar aldaǵy kezeńde de Qoǵamdyq palataǵa aldyna aýqymdy mindetter qoıylyp otyr. Ol – bıznes salasyndaǵy zańnamalardy qaıta qaraý, demografııalyq úrdisterdi zertteý, saıası reformalar boıynsha qoǵamdyq pikirtalas uıymdastyrý.
