Foto: Yuichi Yamazaki/Getty Images
Osylaısha, Sanae Takaıtı Japonııa tarıhynda premer-mınıstr qyzmetine taǵaıyndalǵan alǵashqy áıel atandy.
Daýys berý qorytyndysy boıynsha Takaıtı 465 depýtattyń ishinen 237 daýys jınap, birinshi kezeńde jeńiske jetti. Onyń basty básekelesi – Konstıtýsııalyq-demokratııalyq partııanyń jetekshisi Iosıhıko Noda 149 daýysqa ıe boldy.
Daýys berýge bir kún qalǵanda LDP, parlamentte kópshilikke ıe bolmaǵanyna qaramastan, konservatıvtik «Japonııany jańartý qoǵamy» partııasymen odaq quryp, Takaıtıdiń saılanýyna kepildik jasady.
Aldaǵy táýlikte Sanae Takaıtı jańa úkimet quramyn jasaqtaıtyn bolady.
Japon BAQ-tarynyń málimetinshe, syrtqy ister mınıstri qyzmetine buryn (2019–2021 jj.) osy laýazymda bolǵan Tosımısý Motegı qaıta oralady.
Al partııaishilik saılaýdaǵy qarsylasynyń biri, 44 jastaǵy Sındzıro Koıdzýmı (burynǵy premer Dzıýnıtıro Koıdzýmıdiń uly) qorǵanys mınıstri qyzmetin atqaryp, bul qyzmetti ıelengen eń jas mınıstr bolmaq.
64 jastaǵy Takaıtı – konservatıvtik kózqarastaǵy saıasatker, dástúrli qundylyqtardy qorǵaýdy jaqtaıdy.
-
Ol Japonııada bir jynysty nekeni zańdastyrýǵa qarsy pikir bildirip keledi;
-
Áıeldiń ımperator taǵyna otyrý múmkindigine qarsylyq tanytqan;
-
Japon konstıtýsııasynyń 9-babyn qaıta qaraý, ıaǵnı eldiń qorǵanys kúshterin qurý quqyǵyn zań júzinde bekitý ıdeıasyn qoldaıdy.
Takaıtı Tokıonyń Iаsýkýnı ǵıbadathanasyna jıi baryp, ony saıası pikirtalastardyń nysany etpeý kerek dep esepteıdi. Bul ǵıbadathana Azııa elderinde japon mılıtarızminiń sımvoly sanalady.
Saıasatker ultshyl “Nıppon kaıgı” (Japonııa keńesi) uıymynyń belsendi múshesi. Uıym Japonııanyń Ekinshi dúnıejúzilik soǵys kezinde jasaǵan keıbir qylmystaryn joqqa shyǵarady.
Bilimi boıynsha kıberqaýipsizdik salasynyń mamany. 2022 jyldyń 4 mamyrynda Reseıdiń sanksııalyq tizimine engizilgen bolatyn – ol kezde Takaıtı LDP-nyń saıası keńesin basqarǵan.
Sarapshylardyń pikirinshe, Takaıtı úkimetiniń saıası baǵyty aıtarlyqtaı ózgeriske ushyramaıdy. Ol saılaý naýqany kezinde Japon-amerıkalyq alıansty nyǵaıtýdy, eldiń qorǵanys áleýetin arttyrýdy jáne AQSh-tyń Ortalyq barlaý basqarmasyna uqsas qurylym qurýdy usynǵan.
Takaıtı qaýipsizdik salasyndaǵy qazirgi ahýaldy «Ekinshi dúnıejúzilik soǵys aıaqtalǵaly beri eń kúrdeli kezeń» dep sıpattady.
Aıta ketsek, bul saılaý bastapqyda 2027 jyly ótýi tıis edi, alaıda LDP músheleriniń qysymymen burynǵy premer Sıgerý Isıbanyń otstavkaǵa ketý sheshiminen keıin merziminen buryn ótkizildi.
