«Uly sózdiń ulaǵaty» dep atalǵan bul shara uly oıshyl, kemeńger aqyn Abaı Qunanbaıulynyń 180 jyldyǵy jáne Qazaqstan Respýblıkasynyń Memlekettik egemendigi týraly Deklarasııasynyń qabyldanǵanyna 35 jyl tolýyna oraı uıymdastyryldy.
Keshtiń basty maqsaty – qazaq ádebıetiniń baılyǵyn, ult rýhanııatynyń tereńdigin dáripteý jáne Táýelsiz Qazaqstannyń rýhanı irgetasyn qalaýdaǵy Abaı murasynyń mańyzyn jańa qyrynan tanytý boldy.
Is-sharanyń ashylý saltanatynda Qazaqstan Respýblıkasynyń Bas konsýly Taýboldy Balhııauly Úmbetbaev sóz sóılep, Abaı danalyǵy men el táýelsizdiginiń rýhanı sabaqtastyǵyn erekshe atap ótti. Onyń aıtýynsha, Abaıdyń sózi men oıy qazaq halqynyń rýhanı álemin tereńdetip qana qoımaı, eldiń egemen bolmysyn nyǵaıtqan irgetasqa aınaldy.
Sonymen qatar QR Mádenıet jáne aqparat mınıstrligi Arhıv, qujattama jáne kitap isi komıtetiniń basshysy Almaz Ámirbekuly Myrzahmetov jáne QR Ulttyq memlekettik kitap palatasynyń dırektory Ádil Qoıtanov óz lebizderin bildirip, qazaq ádebıetiniń halyqaralyq keńistikke shyǵýynyń mańyzdylyǵyna toqtaldy.
Kesh aıasynda «Jazý men jarııalaý: Qazaq ádebıetiniń jańa keńistikteri» atty arnaıy taqyryptyq bólim ótti. Bul bólimde belgili ǵalym, akademık, qoǵam qaıratkeri Orazaly Sábden sóz sóılep, Abaı murasynyń qazirgi qazaq qoǵamyndaǵy orny men ulttyq sanany qalyptastyrýdaǵy yqpalyn tereń taldady. Shara barysynda elimizdiń jetekshi baspalary – «Almatykitap», «Atamura», «Mektep», «Arman-PV baspasy», «Evero» baspalary ózderiniń jańa basylymdaryn tanystyryp, zamanaýı ádebı úrdister men kitap isindegi jańashyl baǵyttar jóninde oı bólisti.
Abaıdyń «Qara sózderi» jeti tilde
Keshtiń eń áserli sátteriniń biri – Abaıdyń «Qara sózderiniń» jeti tilde jaryq kórýi týraly jobanyń tanystyrylymy boldy. Bul eńbekti kópshilikke qazaq tili oqytýshysy, atalǵan kitapty qurastyrýshy Gúlmıra Ábilmájinqyzy Amandyqova tanystyrdy. Onyń aıtýynsha, bul joba Abaıdyń danalyq murasyn álemdik deńgeıde nasıhattaýǵa jáne qazaq rýhanııatyn halyqaralyq qaýymdastyqqa tanystyrýǵa baǵyttalǵan.
Kesh sońynda Frankfýrttaǵy halyqaralyq kitap kórmesine arnaıy qastysqan qazaqstandyq delegasııa músheleri men baspa ókilderi ózderiniń tańdaýly eńbekterin Qazaqstan Respýblıkasynyń Bas konsýldyǵy kitaphanasyna tartý etti. Bul bastama qazaq ádebıetiniń shetelde taralýyna serpin berip, ulttyq rýhanııattyń halyqaralyq keńistikte keńinen tanylýyna jol ashady. Sonymen birge olar ádebıet pen baspa isiniń ózekti baǵyttary jóninde pikir almasyp, bolashaqtaǵy shyǵarmashylyq yntymaqtastyqqa nıet bildirdi.
Maın ózeni jaǵasynda ótken «Uly sózdiń ulaǵaty» rýhanı kesh – uly Abaıdyń rýhanı murasyn jańǵyrtyp, Táýelsiz Qazaqstannyń mádenı bolmysyn aıshyqtaǵan taǵylymdy shara boldy. Bul ádebı basqosý qazaq sóz óneriniń bıik qundylyǵyn dáriptep, ulttyq ádebıettiń álemdik mádenıetpen úndesken jańa kezeńin aıqyn kórsetti.
